नाशिकमध्ये गॅस सिलिंडरच्या काळाबाजाराविरोधात पुरवठा विभागाने मोठी कारवाई करत तब्बल 25 लाख रुपयांचा मुद्देमाल जप्त केला आहे. या प्रकरणी नाशिकच्या सातपूर पोलीस ठाण्यात 7 जणांविरुद्ध गुन्हा दाखल करण्यात आला असून पुढील तपास सुरू आहे.
याबाबत मिळालेल्या माहितीनुसार, शहरात गॅस टंचाईच्या पार्श्वभूमीवर सिलिंडरचा काळाबाजार सुरू असल्याची माहिती जिल्हा पुरवठा अधिकारी रमेश गायकवाड यांना मिळाली होती. या माहितीच्या आधारे त्यांच्या पथकाने सातपूर पोलिसांसह सातपूर रोडवरील नाईस संकुल परिसरात छापा टाकला. ही कारवाई रात्री उशिरापर्यंत सुरू होती.
या छाप्यात एका ट्रकमधून मोठ्या प्रमाणावर सिलिंडरची वाहतूक सुरू असल्याचे आढळून आले. तपासणीदरम्यान 158 भरलेले आणि 289 रिकामे असे एकूण 447 सिलिंडर जप्त करण्यात आले. याशिवाय दोन छोटे टेम्पो आणि एक मोठा ट्रकही ताब्यात घेण्यात आला. जप्त केलेल्या सर्व मुद्देमालाची किंमत सुमारे 25 लाख रुपये इतकी असल्याचे सांगण्यात येत आहे.
गॅस टंचाईचा फायदा घेत सिलिंडरचा काळाबाजार केला जात असल्याचा संशय व्यक्त केला जात असून, नाशिकमध्ये या प्रकारातील हा पहिलाच गुन्हा दाखल झाला आहे. सातपूर पोलिसांनी जीवनावश्यक वस्तूंच्या काळाबाजारासंदर्भातील कायद्यांतर्गत गुन्हा नोंदवत चौकशीला सुरुवात केली आहे.
