येस न्युज मराठी नेटवर्क : 15 ऑगस्ट 2021 रोजी संपुर्ण देश स्वातंत्र्याच्या अमृत महोत्सव साजरा करत असताना मात्र सोलापूरचा अवघ्या सात वर्षाचा असलेला सोलापूरचा एक गिर्यारोहक कुशाग्र वागज हा एक भलतेच स्वप्नं उराशी बाळगून मॉस्को रशिया येथे पोहचला.
15 ऑगस्ट रोजी रशिया येथील माऊंट एलब्रेस शिखर सर करून तिथे सर्वांत लांब असा भारताचा ध्वज आणि त्याबरोबर अखंड हिंदुस्थानाचे प्रतिक म्हणुन छत्रपती शिवरायांचा भगवा ध्वज फडकवायचा असा निर्धार करून चि. कुशाग्र हर्षद वागज हा एव्हरेस्टवीर आनंद बनसोडे यांच्या टीम समवेत दि.8 ऑगस्ट रोजी रशिया येथे रवाना झाला. तब्बल जवळपास 18 हजार फूट उंचीवर असलेला माऊंट एलब्रेस इथे त्यादिवशी उणे 25 तापमान तसेच अत्यंत जोरदार अशी बर्फवृष्टी झाली त्यामुळे ही मोहीम काही तासांसाठी पुढे गेली.परंतु भारतीय प्रमाण वेळेनुसार 17 ऑगस्ट सकाळी 10.30 वाजता ही मोहीम अखेरीस पूर्ण झाली. इतक्या कठीण प्रसंगातही सात वर्षाचा कान्हा म्हणजेच कुशाग्र डगमगला नाही.प्रचंड इच्छाशक्ती, कणखर आत्मविश्वास या बळावर कुशाग्रने सलग नऊ तासांची चढाई करून अखेरीस शिखर गाठलेच.
आणखी एक विशेष बाब म्हणजे, माउंट एलब्रेस हे शिखर सर करणारा चि. कुशाग्र वागज हा जगातला सर्वात लहान गिर्यारोहक ठरला आहे.या मोहिमेत अनेक जागतिक विश्वविक्रम नोंदवले गेले आहेत.
या मोहिमेची पूर्वतयारी म्हणुन गेले दीड वर्ष कुशाग्रने शारीरिक तसेच मानसिक स्तरावर प्रचंड कष्ट घेतले. यासाठी मार्गदर्शक म्हणुन कुशाग्रचे वडील जे त्याच्या सोबत मोहिमेत होते डॉ. हर्षद वागज त्याच बरोबर या सर्व मानसिक तयारीत ज्यांचा सर्वात मोठा वाटा होता अशा कुशाग्रच्या आई म्हणजेच डॉ. आशा वागज. शिवाय एव्हरेस्टवीर आनंद बनसोडे यांचे विशेष मार्गदर्शन लाभले.
