कुकडी पाटबंधारे प्रकल्पाच्या ५ हजार ७०४ कोटी ५० लाख रुपयांच्या सुधारित खर्चाला राज्य मंत्रिमंडळाने मंजुरी दिली आहे. या निर्णयामुळे अहिल्यानगरसह ,पुणे आणि सोलापूर जिल्ह्यांतील १ लाख ४४ हजार ९१२ हेक्टर सिंचन क्षमता निर्माण होण्याचा मार्ग मोकळा झाला आहे. विशेष म्हणजे, कुकडी प्रकल्पातील अत्यंत महत्त्वाचा डिंभे-माणिकडोह सुमारे १६ किलोमीटर लांबीचा बोगदा उभारण्याच्या प्रकल्पालाही राज्य सरकारने हिरवा कंदील दिला आहे.
कुकडी पाटबंधारे प्रकल्पाच्या सुधारित खर्चाला ५,७०४.५० कोटी रुपयांची मंजुरी मिळाल्याने प्रकल्पाच्या सिंचन क्षमतेला मोठे बळ मिळणार आहे. याचा लाभ पुणे, अहिल्यानगर आणि सोलापूर जिल्ह्यांतील शेतकऱ्यांना मिळणार आहे. कुकडी डाव्या कालव्याच्या लाभक्षेत्रातील पुणे जिल्ह्यातील जुन्नर, अहिल्यानगर जिल्ह्यातील पारनेर, श्रीगोंदा आणि कर्जत, तसेच सोलापूर जिल्ह्यातील करमाळा तालुक्यांसाठी हा निर्णय अत्यंत महत्त्वाचा मानला जात आहे. पावसावर अवलंबून असलेल्या शेतीला नियमित पाण्याचा आधार मिळाल्यास पीक पद्धतीत बदल होण्यासोबतच शेती उत्पादन वाढण्याची आणि ग्रामीण अर्थव्यवस्थेला चालना मिळण्याची अपेक्षा आहे.
प्रकल्पाचे काम नियोजित वेळेत आणि सुधारित शासकीय मान्यतेच्या मर्यादित पूर्ण करण्याच्या सूचना देण्यात आले आहेत.
