डेंग्यू, स्वाइन फ्लू यांचेही रुग्ण आढळले.
सोलापूर : अचानक झालेली तापमानातील वाढ, मधूनच निर्माण होणारे ढगाळ वातावरण तसेच डासांची वाढ यामुळे सोलापूर शहरात सध्या थंडीताप, सर्दी-खोकल्याच्या रुग्णसंख्येत वाढ होताना दिसत आहे. खासगी तसेच शासकीय रुग्णालयांमध्ये विषाणुजन्य तापाच्या रुग्णांची संख्या वाढली असून, काही ठिकाणी स्वाइन फ्लू आणि डेंग्यूचे रुग्णही आढळून येत आहेत.
ताप, अंगदुखी, डोकेदुखी, सर्दी, खोकला व अशक्तपणा अशा लक्षणांसह रुग्ण उपचारासाठी येत आहेत. डॉक्टरांनी नागरिकांना ताप अंगावर न काढता वेळेत वैद्यकीय तपासणी करून घेण्याचे आवाहन केले आहे.
डेंग्यूच्या पार्श्वभूमीवर रक्तातील पांढऱ्या पेशी (WBC) व प्लेटलेट्सचे प्रमाण तपासणे आवश्यक असते.रक्तातील घटकांमध्ये लक्षणीय बदल आढळल्यास वेळीच उपचार करून पुढील धोका टाळता येऊ शकतो. तापाच्या अवस्थेत शरीरातील पाणी व क्षारांचे संतुलन योग्य राखणेही महत्त्वाचे ठरते.
दरम्यान, घर व परिसरात स्वच्छता राखणे, पाणी साचू न देणे आणि डासांची उत्पत्ती रोखण्यासाठी आवश्यक खबरदारी घेतली पाहिजे. वेळीच निदान आणि योग्य उपचार हाच संसर्गजन्य आजारांपासून बचावाचा प्रभावी मार्ग आहे.
डॉ. अतुल लामकाने.
लिमयेवाडी.सोलापूर.
