TOP 25 | कारभाराचे झाले त्रांगडे.. 3 महिला वरचढ.. महापौर.. पक्षनेत्यांचे वेगळेच !

सोलापूर महापालिकेतील गटबाजी चव्हाट्यावर येऊ लागली आहे. शहरातील आमदार विजयकुमार देशमुख, आमदार देवेंद्र कोठे, आमदार सुभाष देशमुख यांच्या समर्थकांचे नगरसेवक अधिकच आक्रमक होऊ लागले आहेत. त्यामुळे निवडून आलेले 87 भाजपचे नगरसेवक असले तरीही कारभाराचे त्रांगडे झाले आहे. महापौर विनायक कोंड्याल, उपमहापौर ज्ञानेश्वरी देवकर, स्थायी समिती सभापती रंजीता चाकोते, पक्षनेते नरेंद्र काळे यांच्यात वेगवेगळ्या मुद्द्यांवरून टोकाचे मतभेद आहेत. त्यातच हेडमास्तर ची भूमिका बजावणाऱ्या रोहिणी तडवळकर यांचा मोठा हस्तक्षेप असल्यामुळे मोठी नाराजी आहे. सर्वच नगरसेविकांचे पती मनपा कारभारात हस्तक्षेप करतात त्यावेळी रोहिणी तडवळकर यांनी त्यांना चांगलच सुनावले होते. मात्र आता स्वतः रोहिणी तडवळकर यांचे पती राम तडवळकर हे देखील वारंवार महापालिकेत येतात. उपमहापौर ज्ञानेश्वरी देवकर यांनी तीस कोटी रुपयांच्या ठेवी आयसीआयसीआय बँकेत ठेवण्याचा स्थायी समितीने निर्णय घेतल्यामुळे मनपाचे किती नुकसान होते याबाबत आयुक्तांना भेटून निवेदन दिले. यावरून स्थायी समिती सभापती रंजीता चाकोते, रोहिणी तडवळकर विरुद्ध उपमहापौर यांच्यात वाद पेटला आहे. उपमहापौरांनी परस्पर आयुक्तांना भेटणे चुकीचे आहे अशी प्रतिक्रिया तडवळकर यांनी दिली. ठेकेदारांची 27 कोटी रुपयांची बिले देणे, निवडणूक खर्चाचा सात कोटी रुपयांचा हिशोब घेणे, नगरोत्थान तसेच दलित वस्ती सुधारणा योजना या निधीवरून देखील मोठा वाद आहे. त्यामुळे महापालिका कारभाराला शिस्त लावण्यासाठी आता पालकमंत्री जयकुमार गोरे यांनाच मध्यस्थी करावी लागणार आहे नाहीतर या गट तटात शहराची वाट लागेल अशी भीती आहे.