महाराष्ट्र राज्य मार्ग परिवहन महामंडळाची ‘लालपरी’ आता नव्या रुपात प्रवाशांसमोर येणार आहे.रितेश देशमुख आणि जिनेलिया देशमुख यांची एसटीचे ब्रॅण्ड अ‍ॅम्बेसिडर म्हणून निवड करण्यात आली आहे.
.एसटीची प्रतिमा अधिक आधुनिक बनवणे आणि नव्या पिढीला या सेवेकडे आकर्षित करणे हा या निर्णयामागील मुख्य उद्देश आहे. ग्रामीण भागापासून शहरांपर्यंत एसटीची पोहोच अधिक प्रभावी करण्यासाठी या लोकप्रिय जोडीचा वापर केला जाणार आहे.
या निर्णयामुळे एसटीच्या प्रचारात नवचैतन्य येईल, अशी अपेक्षा आहे. केवळ सुविधा वाढवणे पुरेसे नसून, लोकांपर्यंत पोहोचण्यासाठी प्रभावी प्रतिमा निर्माण करणेही तितकेच महत्त्वाचे असते. रितेश आणि जिनेलिया यांच्या लोकप्रियतेचा फायदा घेत प्रवाशांमध्ये सकारात्मक संदेश पोहोचवण्याचा प्रयत्न एसटी महामंडळ करणार आहे.
परिवहन मंत्री प्रताप सरनाईक लवकरच या दोघांसोबत अधिकृत करार करणार असून, हा करार पाच वर्षांसाठी असणार आहे. या काळात दोघेही विविध जाहिराती, मोहिमा आणि सामाजिक उपक्रमांमध्ये सहभागी होणार आहेत.सोशल मीडियावर या निर्णयाची जोरदार चर्चा सुरू असून, प्रवासी आणि चाहत्यांमध्ये उत्सुकता वाढताना दिसत आहे.
