सोलापूर :मृदंग महर्षी गुरुवर्य वै. ह. भ. प. अण्णाबुवा यादव यांच्या ९ व्या पुण्यस्मरणार्थ तसेच श्री संत ज्ञानेश्वर महाराज वारकरी सांप्रदायिक मृदंग वादन शिक्षण संस्था, सोलापूर यांच्या १३ व्या वर्धापन दिनानिमित्त १०८ मृदंग वादक विद्यार्थ्यांचा भव्य मृदंग वादन सोहळा आयोजित करण्यात आला आहे.
हा कार्यक्रम रविवार, दिनांक ११ जानेवारी २०२६ रोजी सायंकाळी ५ ते ८ या वेळेत शिवस्मारक सभागृह, शिंदे चौक, नवीपेठ, सोलापूर येथे संपन्न होणार आहे. या कार्यक्रमात १० ते ११ गटांमध्ये मृदंग वादन सादर केले जाणार असून यामध्ये पंचपदी, सरपटी, मुखडे, तुकडे, शास्त्रीय वादन तसेच अभंग गायनाचा समावेश असणार आहे.
यावेळी मृदंग महर्षी पुरस्काराचे वितरण करण्यात येणार असून यावर्षी सोलापूरचे सुप्रसिद्ध मृदंग वादक कै. सन्मुख अण्णा म्हेत्रे यांच्या स्मरणार्थ मरणोत्तर विशेष मृदंगमहर्षी पुरस्कार त्यांच्या परिवाराला प्रदान करण्यात येणार आहे. तसेच ह. भ. प. विलास महाराज कोकितकर व ह. भ. प. गोविंद महाराज माने यांना मृदंगमहर्षी पुरस्काराने गौरविण्यात येणार आहे.
या सोहळ्यात सोलापूर जिल्ह्यातील वारकरी संप्रदायामध्ये कार्यरत असलेल्या महाराज मंडळींचा सन्मानही करण्यात येणार आहे. कार्यक्रमास श्रीगुरु ह. भ. प. स्वामी महाराज राशिनकर (पंढरपूर) व ह. भ. प. सुधाकर महाराज इंगळे (राष्ट्रीय अध्यक्ष, अखिल भाविक वारकरी मंडळ) यांची प्रमुख उपस्थिती लाभणार आहे. तसेच मा. सूर्यकांत भुजबळ, उपमुख्य कार्यकारी अधिकारी, जिल्हा परिषद सोलापूर हे प्रमुख पाहुणे म्हणून उपस्थित राहणार आहेत.
या कार्यक्रमास उपस्थित राहण्याचे आवाहन ह. भ. प. ज्योतीराम महाराज चांगभले (प्रदेश अध्यक्ष) यांच्यासह ह. भ. प. संभाजी घुले, ह. भ. प. हनुमंत भोसले, ह. भ. प. सुरज यादव, ह. भ. प. किरण शेटे, ह. भ. प. गणेश वारे, श्री सुनील चांगभले, श्री गणेश चांगभले तसेच संगीत विशारद कु. प्रणिती चांगभले यांनी केले आहे.
