माऊली शुगर्स उत्पादित १ लाख क्विंटल साखर पोत्यांचे पूजन

सोलापूर (प्रतिनिधी): १०० टक्के ऑटोमायझेशन असलेला आणि १०० टक्के सल्फर फ्री साखर उत्पादन करणारा सोलापूर जिल्हा अक्कलकोट तालुक्यातील तडवळ येथील माऊली सुगर्स ली. ने चालू गळीत हंगामात आतापर्यंत उत्पादित केलेल्या १ लाख क्विंटल साखर पोत्यांचे पूजन कारखान्याचे संस्थापक चेअरमन सीए व्ही.पी.पाटील यांच्या हस्ते नुकतेच करण्यात आले. उपलब्ध ऊस आणि कारखान्याची कार्यक्षमता लक्षात घेता या हंगामात माऊली शुगर्सने ७ ते ८ लाख में. टन उसाचे गाळप करण्याचे उद्दिष्ट ठेवण्यात आले असल्याचे पाटील यांनी यावेळी सांगितले.
संपूर्णतः अद्यावत तंत्रज्ञान तंत्रज्ञानाचा वापर करून उभारण्यात आलेल्या तडवळ तालुका अक्कलकोट येथील माऊली शुगर्स या कारखान्यात यावर्षी पहिल्या दिवसापासून विक्रमी कार्यक्षमतेचा वापर करीत गळीत हंगामाची सुरुवात झाली आहे. संपूर्णत: ऑटोमायझेशन असलेला माऊली शुगर हा राज्यातील एकमेव साखर कारखाना असून १०० टक्के सल्फर मुक्त साखर तयार करणाराही महाराष्ट्रातील पहिलाच साखर कारखाना म्हणून माऊली शुगर्सची ओळख निर्माण झाली आहे.
अद्ययावत तंत्रज्ञानाचा वापर आणि संपूर्णतः ऑटोमायझेशन यामुळे कारखान्याची कार्यक्षमता वाढली आहे त्यामुळे प्रति दिन ४५०० मेट्रिक टन गाळप क्षमता असलेल्या या कारखान्यात सदया दररोज ५५०० मेट्रिक टनापर्यंत गाळप होत आहे. याशिवाय कारखान्यात साखर उत्पादन करताना कमीतकमी स्टीमचा वापर होत असल्यामुळे विजेच्या उत्पादनातही वाढ झाली आहे. कारखान्याच्या या वैशिष्ट्यांमुळेच या वर्षीच्या गळीत हंगामात निश्चितपणे ७ ते ८ लाख मेट्रिक टन गाळप होईल असा विश्वास कारखान्याचे चेअरमन सीए व्हि.पी.पाटील यांनी व्यक्त केला आहे.
सध्य परिस्थितीत आरोग्याबाबत जागरूकता वाढलेली असल्यामुळे सल्फरमुक्त साखरेला देशात आणि जगभरात मागणी आहे ही बाब लक्षात घेऊन माऊली शुगर्सने सल्फर मुक्त साखर उत्पादन करण्याचा निर्णय घेऊन हा प्लांट उभा केलेला आहे. लवकरच येथे उत्पादित झालेल्या साखरेची देशांतर्गत विक्री आणि बाहेर देशात निर्यात सुरू होणार असल्याचेही चेअरमन सीए व्ही.पी.पाटील यांनी सांगितले आहे.