सोलापूर जिल्ह्यातील कारखानदारांनी ऊस उत्पादक शेतकऱ्यांना प्रति टन साडेतीन हजार रुपयांची पहिली उचल जाहीर करावी या मागणीसाठी माजी खासदार राजू शेट्टी यांच्या नेतृत्वाखाली स्वाभिमानी शेतकरी संघटनेने केलेले आंदोलन जबरदस्त यशस्वी ठरले. विशेष म्हणजे काल एक वाजता शेतकऱ्यांचा हा भव्य मोर्चा जिल्हा परिषद जवळील पूनम गेटवर जाणार होता. त्यासाठी पोलिसांनी तिथे बंदोबस्त लावून बॅरिगेटिंग देखील केले होते मात्र राजू शेट्टी यांनी पोलिसांना चकवा दिला आणि ते मोर्चा घेऊन थेट सात रस्ता येथील नवीन जिल्हाधिकारी कार्यालयात घुसले. राजू शेट्टी यांनी अचानक चकवा देऊन आंदोलन स्थळ बदलल्यामुळे पोलिसांची भंबेरी उडाली. अचानक पोलीस फोर्स मागवून.. बॅरिकेटिंग करणे रस्ता बंद करणे..वाहतूक वळवणे ही कामे करावी लागली. जिल्हाधिकारी कार्यालयाच्या गेटमध्ये घुसून तब्बल बारा तास शेतकऱ्यांनी ठिया केला. रात्री नऊ वाजता रस्त्यावरच बसून जेवणावळी केल्या. यामुळे सोलापूरचे प्रशासन आणि पोलीस जाम वैतागले होते. सोलापूर शहरातील सर्व पोलीस ठाण्यांचा अतिरिक्त बंदोबस्त या ठिकाणी मागवण्यात आला होता.
रात्रीचे बारा वाजले तरीही या आंदोलनावर तोडगा निघत नव्हता. जिल्हाधिकारी एस कार्तिकीयन, पोलीस अधीक्षक अतुल कुलकर्णी, पोलीस आयुक्त एम राजकुमार यांच्यासह जिल्ह्यातील सर्व वरिष्ठ अधिकारी सकाळी दहा वाजल्यापासून रात्री एक वाजेपर्यंत जिल्हाधिकारी कार्यालयात होते. ऊस दर जाहीर होत नाही तोपर्यंत इथेच बसून राहायचे असा पवित्रा काही शेतकऱ्यांनी घेतला तर जिल्हाधिकाऱ्यांचा प्रस्ताव मान्य करू..घरी जाऊ आणि 19 तारखेला पालकमंत्र्यांच्या बैठकीच्या वेळी मोठा दबाव गट निर्माण करण्यासाठी आंदोलन करू असे मतप्रवाह शेतकऱ्यांमध्ये होते. शेवटी राजू शेट्टी यांनी जिल्हाधिकाऱ्यांचा प्रस्ताव सर्वांसमोर वाचून दाखवला आणि यावर तोडगा निघाला . आज सकाळी दहा वाजल्यापासून ऊसतोड पूर्णपणे बंद करणे आणि 19 नोव्हेंबर रोजी सकाळी 11 वाजता पालकमंत्र्यांसमवेत कारखान्याच्या चेअरमन यांची बैठक घेऊन ऊस दर जाहीर करणे तोपर्यंत आंदोलन स्थगित करण्याचा निर्णय घेण्यात आला 19 तारखेला आमच्या मनाप्रमाणे ऊस दर जाहीर केला नाही तर सोलापूर जिल्ह्यातील सर्व महामार्ग बंद पाडू तसेच सोलापूर रेल्वे स्टेशनवर बेमुदत ठिय्या आंदोलन करू असा इशारा देखील यावेळी राजू शेट्टी यांनी दिला. त्यामुळे पहाटे एक वाजता हे आंदोलन स्थगित झाले आणि पोलीस तसेच प्रशासनाने सुटकेचा निश्वास सोडला.







