आजच्या धावपळीच्या आणि तणावपूर्ण जीवनशैलीत मनःशांती, आनंद आणि समाधान मिळविण्यासाठी आध्यात्मिक विचारांची नितांत गरज आहे. याच उद्देशाने प्रजापिता ब्रह्माकुमारी ईश्वरीय विश्व विद्यालय, सोलापूर यांच्या वतीने आंतरराष्ट्रीय प्रेरणादायी वक्त्या आणि राजयोग शिक्षिका बी.के. शिवानी दीदी यांच्या विशेष मार्गदर्शनपर कार्यक्रमाचे आयोजन गुरुवार, दि. १९ नोव्हेंबर रोजी करण्यात आले आहे.
‘सरल मन, सरल जीवन’ या विषयावर होणारा हा कार्यक्रम सायंकाळी ५.३० ते रात्री ८ या वेळेत हरिभाई देवकरण प्रशालेच्या मैदानावर आयोजित करण्यात आला आहे. या कार्यक्रमासाठी सर्वांना मोफत प्रवेश ठेवण्यात आला असून, नागरिकांनी मोठ्या संख्येने उपस्थित राहावे, असे आवाहन आयोजकांच्या वतीने करण्यात आले आहे.
आजच्या धावपळीच्या युगात प्रत्येक व्यक्तीला मानसिक तणाव, नकारात्मक विचार आणि कौटुंबिक तसेच सामाजिक समस्यांचा सामना करावा लागत आहे. अशा परिस्थितीत मनःशांती, सकारात्मक विचार, आनंदी जीवन आणि आत्मिक समाधान मिळविण्यासाठी आध्यात्मिक दृष्टिकोन महत्त्वाचा ठरत आहे. बी.के. शिवानी दीदी आपल्या मार्गदर्शनातून उपस्थितांना नकारात्मक विचारांवर मात करून शांत, संतुलित आणि आनंदी जीवन जगण्याची दिशा देणार आहेत.
या कार्यक्रमात मनःशांती, तणावमुक्त जीवन, सकारात्मक विचार, भावनिक बुद्धिमत्ता, स्वव्यवस्थापन, नातेसंबंधातील सुसंवाद, कर्मसिद्धांत, आत्मसन्मान, आत्मविश्वास आणि आत्मपरिवर्तन अशा विविध विषयांवर मार्गदर्शन करण्यात येणार आहे.
दरम्यान, २०, २१ आणि २२ नोव्हेंबर रोजी तीन दिवसीय मेडिटेशन शिबिराचेही आयोजन करण्यात आले आहे. सकाळी ७ ते ८ आणि सायंकाळी ६.३० ते ७.३० या वेळेत शिवछत्रपती सभागृह येथे हे शिबिर होणार असून, बी.के. डॉ. दामिनी दीदी मार्गदर्शन करणार आहेत.
कार्यक्रमासाठी पूर्वनोंदणीसाठी www.omshanti.in/solapur या संकेतस्थळाला भेट द्यावी. नोंदणी न केलेल्या नागरिकांनाही मुख्य कार्यक्रमासाठी मोफत प्रवेश देण्यात येणार आहे. सोलापूरकरांनी या आध्यात्मिक पर्वणीचा लाभ घ्यावा, असे आवाहन आयोजकांनी केले आहे.
