सोलापूर पोलिसांचं नियोजन चुकलं, रस्त्यावर लागल्या भल्या मोठ्या रांगा…!

सोलापूर- तुळजापूर रस्त्यावर आज सकाळी वाहनांच्या भल्या मोठ्या रांगा आणि झालेलं ट्रॅफिक जाम पाहिल्यानंतर सोलापूर शहर आणि सोलापूर ग्रामीण पोलिसांचं इथलं वाहतूक नियोजन चुकलं असेच म्हणावं लागेल. काल रात्रभर आणि आज दिवसभर देखील सोलापूर तुळजापूर या रस्त्यावरून शहर जिल्ह्यातील विविध मंडळे तुळजापुरातून ज्योत प्रज्वलित करून धावत येत असतात. आज सकाळी सहा वाजल्यापासून भली मोठी रांग रुपा भवानी मंदिरापासून ते हिप्परगा -हगलुरच्या देखील पुढे लागली होती. वास्तविक पाहता हा सहा पदरी रस्ता आहे. एका बाजूने फक्त मंडळाचे ज्योत घेऊन येणारे कार्यकर्ते,त्यांच्या दुचाकी आणि त्यांच्या चार चाकी गाड्या सोडणे अपेक्षित होते मात्र सर्वच वाहने त्याच लेन मधून सोलापूरच्या दिशेने येत होती. त्यामुळे एकूणच सर्वांना वाहतूक कोंडी पाहायला मिळाली. उपस्थित असलेली पोलिसांची यंत्रणा या भल्या मोठ्या वाहतूक रांगासमोर तोकडी पडल्याचे दिसून आले. विशेषतः रूपा भवानी चौकातच प्रचंड मोठी वाहतुकीची कोंडी झाली आहे इथून पुढे नऊ दिवस इथे असेच गर्दी राहणार आहे त्यामुळे आता तरी पोलिसांनी याचे योग्य नियोजन करावे अशीच आणि त्यांची भावना आहे.