व्याख्यानासह नामवंत गायक, संगीतकार, नृत्यदिग्दर्शकांचे सादरीकरण
सुमारे अडीच हजार विद्यार्थी सहभागी होणार
सोलापूर : मराठी भाषेला अभिजात भाषेचा दर्जा मिळाल्याच्या पार्श्वभूमीवर आणि १०० व्या अखिल भारतीय मराठी साहित्य संमेलनाच्या निमित्ताने पुण्यश्लोक अहिल्यादेवी होळकर सोलापूर विद्यापीठात ६ ऑक्टोबर रोजी ‘अभिजात मराठी, अभिमान मराठी’ या विशेष उपक्रमाचे आयोजन करण्यात आले आहे, अशी माहिती प्र-कुलगुरू प्रा. लक्ष्मीकांत दामा यांनी पत्रकार परिषदेत दिली.
मराठी भाषा विभाग, महाराष्ट्र शासन, जिल्हाधिकारी कार्यालय, सोलापूर आणि विद्यापीठ यांच्या संयुक्त विद्यमाने हा कार्यक्रम होणार आहे. दुपारी १२.३० ते १.३० या वेळेत सामाजिक कार्यकर्ते डॉ. दिवाकर कुलकर्णी यांचे ‘अभिजात मराठी, अभिमान मराठी’ विषयावर व्याख्यान होणार आहे. कुलगुरू प्रा. प्रकाश महानवर अध्यक्षस्थानी तर प्र-कुलगुरू प्रा. लक्ष्मीकांत दामा प्रमुख उपस्थितीत राहणार आहेत. कार्यक्रमात प्रसिद्ध पार्श्वगायक, लाईव्ह परफॉर्मर, संगीतकार व सारेगमपाचे विजेते अभिजीत कोसंबी, पार्श्वगायक व संगीतकार प्रसन्नजीत कोसंबी, तसेच मराठी-हिंदी चित्रपटसृष्टीतील ज्येष्ठ नृत्यदिग्दर्शक व लोककला तज्ज्ञ सुभाष नकाशे यांच्यासह विविध कलावंतांचे सादरीकरण होणार आहे. कार्यक्रमाचे निवेदन प्रसिद्ध अभिनेते व विनोदी कलाकार दिगंबर नाईक करणार आहेत.
या उपक्रमासाठी राज्य मराठी विकास संस्थेचे समन्वयक व प्रतिनिधी उपस्थित राहणार असून, विद्यापीठांतर्गत महाविद्यालयांतील २ ते २.५ हजार विद्यार्थी, प्राध्यापक, अभ्यासमंडळांचे अध्यक्ष व सदस्य, साहित्यिक, लेखक, कलावंत आणि मराठी रसिक सहभागी होणार आहेत. कार्यक्रमाचे आयोजक प्र-कुलसचिव डॉ. अतुल लकडे असून, समन्वयक मानवविज्ञान विद्याशाखेचे अधिष्ठाता प्रा. डॉ. महेश खरात आहेत.
या पत्रकार परिषदेस प्रसिद्धी समन्वयक तथा उप-कुलसचिव डॉ. मलिक रोकडे, प्र-कुलसचिव डॉ. अतुल लकडे, अधिष्ठाता प्रा. डॉ. महेश खरात,सहायक-कुलसचिव डॉ. शिवाजी शिंदे, प्रा. अंबादास भासके, राहुल वंजारी उपस्थित होते.
