सोलापुरातील बेकायदेशीर डिजिटल संदर्भात पोलिसांनी हात टेकले…!

सोलापूर शहरात कुणीही यावे आणि महापालिका तसेच पोलीस खात्याला न जुमानता कुठेही कितीही मोठी डिजिटल उभारावेत अशी स्पर्धा सुरू झाली आहे. महापालिकेचे आयुक्त सचिन ओंबासे यांचेच प्रशासनावर कंट्रोल नसल्यामुळे महापालिकेत मनमानी सुरू आहे. गेल्या महिनाभरापासून सोलापूर शहरात नो डिजिटल झोन मध्ये देखील महापालिकेचे नियम पायदळी तुडवून भले मोठे बोर्ड लावण्याची प्रथा सुरू झाली आहे. महापालिका प्रशासन डोळे असून आंधळ्याच्या भूमिकेमध्ये वावरत आहे. वास्तविक पाहता कुठेही डिजिटल बोर्ड उभारताना महापालिकेकडे अर्ज करून रीतसर फी भरून आणि शहर वाहतूक शाखेची एनओसी घेतल्याशिवाय बोर्ड उभा करता येत नाहीत. मात्र सोलापूर शहरात नियम धाब्यावर बसवणाऱ्याचेच कौतुक सुरू आहे. महापालिका प्रशासनाप्रमाणे सोलापूर शहर पोलिसांनी देखील या डिजिटलवाल्यासमोर हात जोडले आहेत. महापालिका पोलिसांकडे आणि पोलीस महापालिकेकडे बोट दाखवत आहेत. कोणत्याही मिरवणुका असू दे यामध्ये सोलापूर शहरात बेकादेशीर डिजिटल बोर्ड उभारणे,बेसुमार गुलाल उधळणे, प्लास्टिकचे तुकडे तुकडे हवेत उडवून हवेचे प्रदूषण करणे यातच अनेक जण धन्यता मानू लागली आहे. याबाबत शहरातील आमदार तसेच प्रशासनातील अधिकारी आणि पालकमंत्री देखील काहीच बोलत नाहीत. कायद्याची अंमलबजावणी करण्याची जबाबदारी पोलिसांच्या हातात असताना देखील ते या डिजिटल बोर्डवर का कारवाई करत नाहीत, याचे उत्तर पोलीस आयुक्त राजकुमार यांना द्यावे लागणार आहे.