सर्व राजकीय पक्षांनी आदर्श आचारसंहितेचे काटेकोरपणे पालन करावे
सोलापूर : भारत निवडणूक आयोगाने महाराष्ट्र विधान परिषदेच्या पदवीधर व शिक्षक मतदारसंघांसाठी 2026 च्या द्विवार्षिक निवडणुकीचा कार्यक्रम जाहीर केला आहे. त्यानुषंगाने पुणे विभाग पदवीधर व शिक्षक मतदारसंघासाठी दि. 23 ऑक्टोबर 2026 रोजी मतदान, तर दि. 27 ऑक्टोबर 2026 रोजी मतमोजणी होणार आहे. या निवडणुकीच्या अनुषंगाने सोलापूर जिल्ह्यातील राजकीय पक्षांच्या प्रतिनिधींची बैठक जिल्हाधिकारी कार्यालयात पार पडली.
बैठकीस उपजिल्हा निवडणूक अधिकारी लक्ष्मण कसेकर यांच्यासह विविध राजकीय पक्षांचे प्रतिनिधी उपस्थित होते. यावेळी उपजिल्हा निवडणूक अधिकारी कासेकर यांनी उपस्थित प्रतिनिधींना निवडणूक कार्यक्रम, मतदारसंघाची रचना, मतदार यादी तसेच निवडणूक प्रक्रियेबाबत सविस्तर माहिती दिली.
या निवडणुकीसाठी विभागीय आयुक्त हे निवडणूक निर्णय अधिकारी, तर जिल्हाधिकारी हे सहाय्यक निवडणूक निर्णय अधिकारी म्हणून काम पाहणार आहेत. तसेच अतिरिक्त सहाय्यक निवडणूक निर्णय अधिकारी म्हणून 11 उपजिल्हाधिकारी व 12 तहसीलदार निवडणूक प्रक्रियेतील विविध जबाबदाऱ्या पार पाडणार असल्याचे कासेकर यांनी सांगितले.
अंतिम मतदार यादी 4 ऑक्टोबर रोजी
दि. 25 सप्टेंबर 2026 रोजीच्या उपलब्ध आकडेवारीनुसार सोलापूर जिल्ह्यात पदवीधर मतदारसंघासाठी 40 हजार 17 मतदार, तर शिक्षक मतदारसंघासाठी 13 हजार 728 मतदार आहेत. त्यानंतर मतदार नोंदणी प्रक्रियेत वाढ झालेली असून, दि. 26 सप्टेंबर 2026 पर्यंत पदवीधर मतदारसंघासाठी 9 हजार 960, तर शिक्षक मतदारसंघासाठी 1 हजार 485 मतदारांचे अर्ज प्राप्त झाले असून त्याची छाननी केल्यानंतर अंतिम मतदार यादीत वाढ होणार असल्याचे कासेकर यांनी सांगितले.
सध्या दि. 25 सप्टेंबरच्या आकडेवारीनुसार पदवीधर मतदारसंघासाठी जिल्ह्यात 109 मतदान केंद्रे, तर शिक्षक मतदारसंघासाठी 71 मतदान केंद्रे आहेत. दि. 26 सप्टेंबरपर्यंत झालेल्या मतदारवाढीच्या अनुषंगाने दि. 4 ऑक्टोबर 2026 रोजी प्रसिद्ध होणाऱ्या अंतिम मतदार यादीमध्ये मतदान केंद्रांच्या संख्येतही वाढ होण्याची शक्यता असल्याचे त्यांनी स्पष्ट केले.
अंतिम मतदार यादी दि. 4 ऑक्टोबर 2026 रोजी प्रसिद्ध करण्यात येणार असून, ती सर्व संबंधित राजकीय पक्षांना उपलब्ध करून देण्यात येणार असल्याची माहितीही उपजिल्हा निवडणूक अधिकारी कासेकर यांनी दिली.
आचारसंहितेचे काटेकोर पालन करण्याचे आवाहन
पदवीधर व शिक्षक मतदारसंघाच्या निवडणूक प्रक्रियेदरम्यान सर्व राजकीय पक्षांनी भारत निवडणूक आयोगाने लागू केलेल्या आदर्श आचारसंहितेचे काटेकोरपणे पालन करावे, असे आवाहन उपजिल्हा निवडणूक अधिकारी लक्ष्मण कासेकर यांनी केले. निवडणूक प्रक्रिया मुक्त, निष्पक्ष व शांततापूर्ण वातावरणात पार पाडण्यासाठी प्रशासनाला सर्व राजकीय पक्षांनी सहकार्य करावे, असेही त्यांनी सांगितले.
महाराष्ट्र विधान परिषदेच्या पदवीधर व शिक्षक मतदारसंघांच्या निवडणुकीसाठी मतदार यादी, मतदान केंद्रे आणि इतर आवश्यक निवडणूक तयारीची प्रक्रिया प्रशासनाकडून नियोजनबद्ध पद्धतीने सुरू असल्याची माहिती बैठकीत देण्यात आली.
