सोलापूर शहर मध्य मतदारसंघाची प्रारूप मतदार यादी प्रसिद्ध..

सोलापूर, दि. ४- भारत निवडणूक आयोगाच्या निर्देशानुसार विशेष सखोल पुनरीक्षण कार्यक्रमांतर्गत २४९-सोलापूर शहर मध्य विधानसभा मतदारसंघाची प्रारूप मतदार यादी दि. ३१ ऑगस्ट २०२६ रोजी प्रसिद्ध करण्यात आली आहे. पात्र मतदारांनी आपले तसेच कुटुंबातील सदस्यांचे नाव मतदार यादीत आहे किंवा नाही, याची तपासणी करून आवश्यक असल्यास दावे व हरकती नोंदवाव्यात, असे आवाहन मतदार नोंदणी अधिकारी तथा उपविभागीय अधिकारी, सोलापूर क्रमांक १ यांच्या वतीने करण्यात आले आहे.

प्रारूप मतदार यादी मतदारांच्या माहितीसाठी व तपासणीसाठी सर्व संबंधित मतदान केंद्रे, तहसील कार्यालय, सोलापूर येथील निवडणूक शाखा, तसेच उपविभागीय अधिकारी कार्यालय व सहाय्यक मतदार नोंदणी अधिकारी (AERO) कार्यालयात उपलब्ध करून देण्यात आली आहे.

मतदारांनी प्रारूप यादीमध्ये आपले नाव, पत्ता, वय, लिंग, मतदार ओळखपत्र क्रमांक (EPIC) तसेच मतदान केंद्राची माहिती तपासावी. नावामध्ये काही त्रुटी असल्यास किंवा नाव समाविष्ट नसल्यास विहित नमुन्यात अर्ज करून दुरुस्ती अथवा नाव समाविष्ट करण्याची कार्यवाही करता येणार आहे.

दावे व हरकतींसाठी ३० सप्टेंबरपर्यंत मुदत

प्रारूप मतदार यादी प्रसिद्ध झाल्यानंतर दि. ३१ ऑगस्ट ते ३० सप्टेंबर २०२६ या कालावधीत दावे व हरकती स्वीकारण्यात येणार आहेत. संबंधित मतदान केंद्रस्तरीय अधिकारी (BLO), सहाय्यक मतदार नोंदणी अधिकारी (AERO) तसेच तहसील कार्यालयातील निवडणूक शाखेत अर्ज सादर करता येतील.

विविध अर्जांसाठी नमुना ६, ७ व ८

नमुना क्र. ६ (Form 6) : नव्याने मतदार नोंदणी करण्यासाठी. दि. १ ऑक्टोबर २०२६ रोजी किंवा त्यापूर्वी वयाची १८ वर्षे पूर्ण करणाऱ्या पात्र नागरिकांसाठी हा अर्ज करता येईल.

नमुना क्र. ७ (Form 7) : मतदार यादीतील चुकीची अथवा मृत/स्थलांतरित व्यक्तीची नोंद वगळण्यासाठी किंवा नाव वगळण्याबाबत हरकत नोंदविण्यासाठी.

नमुना क्र. ८ (Form 8) : मतदार यादीतील दुरुस्ती, जन्मतारीख/वय, लिंग, नातेसंबंध, पत्ता बदल, अपंगत्वाची नोंद किंवा नवीन ई-एपिक (E-EPIC)/नवीन मतदार ओळखपत्रासाठी.

नागरिकांना Voter Services Portal (voters.eci.gov.in) व Voter Helpline App द्वारेही ऑनलाइन अर्ज व आवश्यक कार्यवाही करता येणार आहे. महाराष्ट्रातील प्रारूप मतदार याद्यांसाठी अधिकृत निवडणूक विभागाची माहितीही उपलब्ध आहे.

मतदारांनी मतदानाचा हक्क अबाधित राहण्यासाठी प्रारूप मतदार यादीत आपले नाव तपासून, आवश्यक असल्यास दि. ३० सप्टेंबर २०२६ पूर्वी दावे अथवा हरकती नोंदवाव्यात. तसेच लोकशाही बळकट करण्यासाठी प्रत्येक पात्र नागरिकाने या पुनरीक्षण प्रक्रियेत सक्रिय सहभाग घ्यावा, असे आवाहन मतदार नोंदणी अधिकारी तथा उपविभागीय अधिकारी, सोलापूर क्रमांक १ यांनी केले आहे.