TOP 25 । महापालिका निवडणूक खर्च, सगळ्यांचा टक्केवारीवर डोळा..अधिकारी मालामाल !

सोलापूर महापालिकेच्या निवडणुकीत प्रशासनाने नेमका किती खर्च केला याची आकडेवारी एकाही अधिकाऱ्याला सांगता येत नाही हे दुर्दैव. महापालिका आयुक्त सचिन ओंबासे आणि तत्कालीन उपायुक्त आशिष लोकरे यांनी मनमानी केल्यामुळे बहुतांश अधिकाऱ्यांनी या प्रक्रियेतून हात झटकले आहेत. स्टेशनरी तसेच अधिकाऱ्यांशी लागेबंदे असलेल्या कंत्राटदारांचे सुमारे चार ते पाच कोटी रुपये आदा केले आहेत. आता उर्वरित रकमेसाठी मनमानी नियम लावून कंत्राटदारांना अडकविले जात आहे. मंडप- स्टेज- खुर्च्या आधीचा खर्च अगोदर बारा कोटी दाखवण्यात आला त्यानंतर तो सहा कोटी 70 लाख झाला. आणि आता स्थायी समितीला प्रशासनाने साडेतीन कोटी रुपयांचा विषय पाठवला आहे. आयुक्तांनी मनमानी करून आमची बिले कमी केली. काही अधिकाऱ्यांनी यामध्ये लाखो रुपये खाल्ले असा आरोप कंत्राटदार करत आहेत. स्थायी समिती सभापती रंजीता चाकोते यांच्यापुढे हा विषय आल्यानंतर त्यांनी देखील हा विषय प्रलंबित ठेवला आणि नंतर प्रशासनाकडे पाठवला. वास्तविक पाहता महापालिकेला प्रति मतदार शंभर रुपये खर्च करण्याचा निवडणूक आयोगाने दंडक घालून दिला होता. मात्र प्रशासनातील काही अधिकाऱ्यांनी मनमानी केली. निवडणूक निर्णय अधिकारी तसेच संबंधित अधिकाऱ्यांनी आम्हाला लेखी ऑर्डर देऊन निवडणुकीत अर्जंट बेसिसवर कामे करून घेतली.त्यावर त्यांच्या सह्या देखील आहेत. गुगल फोटो देखील आहेत. मात्र आता आयुक्तांनी हात झटकले आहेत. त्यामुळे या प्रकरणाला गंभीर वळण लागली असून प्रशासनातील काही अधिकारी आणि काही नगरसेवक टक्केवारी मुळे बदनाम होऊ लागले आहेत. पारदर्शक पद्धतीने कामकाज केले असेल तर महापालिका आयुक्तांनी खर्चाचा तपशील जाहीर करणे गरजेचे आहे.