आरोग्य व शिक्षण समिती सभापती चेतनसिंह केदार-सावंत यांचा पुढाकार; शैक्षणिक गुणवत्तावाढीसाठी महत्त्वपूर्ण सूचना
महाराष्ट्र राज्याचे ग्रामविकास व पंचायतराज मंत्री तथा सोलापूर जिल्ह्याचे पालकमंत्री, जयकुमार गोरे यांच्या मार्गदर्शनाखाली जिल्हा परिषद सोलापूरच्या शिक्षण व्यवस्थेत सकारात्मक आणि गुणवत्तापूर्ण परिवर्तन घडवून आणण्यासाठी आरोग्य व शिक्षण समितीचे सभापती मा. चेतनसिंह केदार-सावंत यांनी महत्त्वपूर्ण पुढाकार घेतला आहे. विद्यार्थ्यांना दर्जेदार शिक्षण, शाळांमध्ये सक्षम शैक्षणिक वातावरण आणि शिक्षण विभागाच्या कामकाजात प्रभावी सुधारणा घडवून आणण्याच्या उद्देशाने आयोजित शिक्षण समितीच्या बैठकीत त्यांनी विविध महत्त्वपूर्ण सूचना केल्या.
तालुकास्तरावर राबविण्यात येत असलेला अभिनव शाळा तपासणी पॅटर्न संपूर्ण सोलापूर जिल्ह्यात लागू करण्याची सूचना त्यांनी केली. शाळांची तपासणी केवळ कागदपत्रांपुरती मर्यादित न ठेवता प्रत्यक्ष शाळांना भेटी देऊन विद्यार्थ्यांची शैक्षणिक गुणवत्ता, शिक्षकांचे अध्यापन, शाळांमधील भौतिक सुविधा आणि शैक्षणिक वातावरणाचा सर्वांगीण आढावा घेण्यावर त्यांनी भर दिला. शाळा तपासणी ही केवळ औपचारिकता न राहता विद्यार्थ्यांच्या गुणवत्तावाढीचे प्रभावी माध्यम ठरावे, अशी भूमिका त्यांनी मांडली.
शिष्यवृत्ती परीक्षेची व्याप्ती वाढविण्याच्या दृष्टीने सध्या चौथी आणि सातवीच्या विद्यार्थ्यांपुरती असलेली संधी अधिक व्यापक करून सर्व इयत्तांतील विद्यार्थ्यांना परीक्षेत सहभागी होता यावे, यासाठी आवश्यक नियोजन करण्याच्या सूचनाही त्यांनी दिल्या. विद्यार्थ्यांमध्ये स्पर्धात्मक वृत्ती, शैक्षणिक गुणवत्ता आणि प्रोत्साहन वाढविण्यावर यामुळे भर देता येणार आहे.
जिल्हा परिषदेच्या सर्व शाळांचा मालकी हक्क जिल्हा परिषदेकडे घेण्याबाबत आवश्यक कार्यवाही करण्याचे निर्देश त्यांनी संबंधित अधिकाऱ्यांना दिले. या प्रक्रियेत येणाऱ्या तांत्रिक अथवा प्रशासकीय अडचणी समितीसमोर मांडून त्यावर योग्य तोडगा काढण्याचेही त्यांनी स्पष्ट केले.
याशिवाय, जवाहरलाल नेहरू मुलांचे वसतिगृह आणि सावित्रीबाई फुले मुलींचे वसतिगृह येथील भौतिक सुविधांची सद्यस्थिती जाणून घेण्यासाठी सविस्तर अहवाल सादर करण्याच्या सूचना देण्यात आल्या. विद्यार्थ्यांना सुरक्षित, सुविधायुक्त आणि दर्जेदार निवास व्यवस्था उपलब्ध करून देण्याच्या दृष्टीने या बाबींचा आढावा घेण्यात येणार आहे.
या बैठकीस आरोग्य व शिक्षण समितीचे सभापती चेतनसिंह केदार-सावंत, शिक्षण समिती सदस्य चंद्रकांत ज्ञानेश्वर जाधव, श्रुती भोरगुंडे, सुषमा नारनवर, विजयराज डोंगरे, शिवराज म्हेत्रे, प्राथमिक शिक्षणाधिकारी विशाल मुळे, शिक्षणाधिकारी योजना सुजित शिंदे, उपशिक्षणाधिकारी, शिक्षण विभागातील विस्तार अधिकारी तसेच सर्व गटशिक्षणाधिकारी उपस्थित होते.
