सोलापूर स्थानिक स्वराज्य मतदार संघ निवडणुकीच्या माध्यमातून जिल्ह्यातील विविध पक्षांचे राजकारण आणि नेत्यांच्या भूमिका पुन्हा चव्हाट्यावर आल्या आहेत. पालकमंत्री जयकुमार गोरे यांनी महायुतीची चांगली मूठ बांधली मात्र महाविकास आघाडीमध्ये बिघाडी झाल्याचे पाहायला मिळते. राष्ट्रवादी शरद पवार गटाचे करमाळ्यातून नारायण पाटील, माळशिरस मधून उत्तम जानकर, पंढरपुरातून अभिजीत पाटील, मोहोळ मधील राजू खरे असे चार आमदार निवडून आले आहेत. शिवाय सांगोल्यात आमदार बाबासाहेब देशमुख हे देखील शरद पवार यांच्या विचारसरणीचे आहेत . राष्ट्रवादी शरद पवार गटाचे माढा मतदारसंघातून धैर्यशील मोहिते पाटील आणि सोलापूर मतदारसंघातून काँग्रेसच्या प्रणिती शिंदे खासदार म्हणून निवडून आल्या. महाविकास आघाडीचे दोन खासदार आणि पाच आमदार असताना प्रत्येकाची भूमिका वेगवेगळी दिसत आहे. मोहोळचे आमदार राजू खरे हे वारंवार एकनाथ शिंदे यांच्या शिवसेने सोबतच दिसतात. आता ते म्हणतात मी शरद पवार गटाचे काम करतोय. भाजपचे राजा राऊत यांचा उमेदवारी अर्ज भरताना करमाळ्याचे आमदार नारायण पाटील तसेच सांगोल्याचे शेकापचे आमदार बाबासाहेब देशमुख दिसले. माळशिरसचे आमदार उत्तम जानकर यांनी मोहिते पाटलांवर थेट टीका करून त्यांनी माझा केसाने गळा कापला असा आरोप केला. पंढरपूरचे आमदार अभिजीत पाटील हे देखील जास्त सक्रिय दिसत नाहीत. खासदार धैर्यशील आणि खासदार प्रणिती हे दोघे एकत्रितपणे महाविकास आघाडीची मोट बांधताना दिसत नाहीत. त्यामुळे महाविकास आघाडीमध्ये बिघाडी झाल्याचे दिसत असून राऊतच पुन्हा ‘राजा’ होणार असे सध्याचे चित्र आहे.
महाआघाडीत -बिघाडी..5 आमदार,दोन खासदार.. ताकद दिसेना !
