भुजबळांची ‘ती’ अट पूर्ण होत नसल्याने अखेर शेवटच्या दिवशी म्हणजे रविवारी रात्री उशिरा माजी आमदार राजेंद्र जैन यांच्या नावाची घोषणा करण्यात आली.
राज्यसभेवर जाण्यासाठी छगन भुजबळ इच्छुक होते.
मात्र त्यासाठी पुतणे समीर भुजबळ यांना तात्काळ मंत्रिमंडळात कॅबिनेट मंत्री करावे अशी अट त्यांनी घातली होती.यासंदर्भात अजित पवार गटाच्या शीर्षस्थ नेत्यांनी मुख्यमंत्री देवेंद्र फडणवीस यांच्याशी चर्चाही केली. मात्र यासंदर्भातला निर्णय दिल्लीतून भाजपा पक्षश्रेष्ठीं घेतील असे सांगत हा चेंडू दिल्लीकडे टोलवला.
तिकडे दिल्लीतून याला नकार मिळाल्याने भुजबळ यांचे नाव मागे पडल्याचे सूत्रांनी सांगितले.त्यानंतर सुनेत्रा पवार यांनी राज्यसभा सदस्यत्वाचा राजीनामा दिलेल्या या रिक्त जागेसाठी अजित पवार गटाकडून रविवारी रात्री उशिरा माजी आमदार राजेंद्र जैन यांच्या नावाची घोषणा करण्यात आली.
सुनेत्र पवार यांच्या देवगिरी बंगल्यावर झालेल्या या बैठकीत प्रदेशाध्यक्ष सुनील तटकरे यांनी जैन यांच्या नावाची घोषणा केली.यावेळी प्रफुल्ल पटेल, छगन भुजबळ, दिलीप वळसे पाटील आदी नेते उपस्थित होते.जैन यांच्या नावाची घोषणा केल्याने तटकरे आणि प्रफुल्ल पटेल यांचे राजकीय महत्त्व वाढले असल्याची चर्चा रंगली आहे.
गोंदिया जिल्ह्यातील राजेंद्र जैन हे प्रफुल्ल पटेल यांचे विश्वासू आणि राष्ट्रवादी काँग्रेस विधान परिषदेचे माजी आमदार आहेत.
