उमेदवारी मिळवण्याच्या शर्यतीत माजी आमदार राजेंद्र राऊत जिंकले…!

स्थानिक स्वराज्य संस्था मतदार संघातील सोलापूरची उमेदवारी भाजपकडून कोणाला मिळणार याची प्रचंड उत्सुकता लागली होती. या पदासाठी पंढरपूरचे माजी आमदार प्रशांत परिचारक, मोहोळ चे माजी आमदार राजन पाटील, बार्शीचे माजी आमदार राजेंद्र राऊत, भाजपचे माजी जिल्हाध्यक्ष शहाजी पवार यांची नावे चर्चेत होती. प्रशांत परिचारक यांनाच उमेदवारी फिक्स होणार असा अनेकांचा अंदाज फेल ठरवत भाजपने ही उमेदवारी बार्शीचे माजी आमदार राजेंद्र राऊत यांना जाहीर केली आहे. भाजप शिंदे सेना तसेच अजित पवार यांची राष्ट्रवादी अशा महायुतीच्या माध्यमातून राज्यातील स्थानिक स्वराज्य संस्था निवडणूक लढविल्या जाणार असल्यामुळे आणि सोलापुरात 616 मतदारांपैकी सुमारे पावणे चारशे मतदार हे महायुतीचे असल्यामुळे राजेंद्र राऊत यांचा विजय पक्का मानला जात आहे. 2024 च्या विधानसभा निवडणुकीत मनोज जरांगे पाटील यांच्या विरोधात थेट भूमिका घेतल्यामुळे त्यांचा पराभव झाला. याची उतराई होण्यासाठीच मुख्यमंत्री देवेंद्र फडणवीस यांनी राजेंद्र राऊत यांना उमेदवारी दिली आहे. तसेच आगामी होणारे विधानसभा निवडणुकीसाठी त्यांचा चिरंजीव रणवीर याच्यासाठी तयारी केली जाणार आहे. पंढरपूरचे आदित्य फत्तेपूरकर यांना काँग्रेसकडून उमेदवारी देण्यात आली आहे. महाविकास आघाडीकडे नगण्य मते असल्यामुळे सध्या तरी महायुतीला ही लढत एकेरी वाटत आहे. आज उमेदवारी अर्ज भरण्याचा शेवटचा दिवस आहे. उद्या अर्जाची छाननी होणार असून 4 जून पर्यंत उमेदवारी अर्ज माघार घेण्याची मुदत असून 18 जून रोजी सकाळी आठ ते दुपारी चार वाजेपर्यंत मतदान होणार असून 22 जून रोजी याची मतमोजणी होणार आहे.