करमाळा पोलिसांची मोठी कारवाई : १७० इंजेक्शनच्या बाटल्या जप्त

दोन जणांना अटक

करमाळा – करमाळा पोलिसांनी अमली व औषधांच्या गैरवापराविरोधात मोठी कारवाई करत सुमारे १ लाख ९० हजार रुपयांचा मुद्देमाल जप्त केला आहे. या कारवाईत MEPHENTERMINE SULPHITE INJECTION IP या औषधाच्या एकूण १७० बाटल्या हस्तगत करण्यात आल्या असून दोन संशयितांना अटक करण्यात आली आहे.

पोलिसांनी दिलेल्या माहितीनुसार, दिनांक २९ मे २०२६ रोजी दुपारी साडेबारा वाजण्याच्या सुमारास करमाळा शहरातील कुर्डुवाडी रोडवरील पाण्याच्या टाकीजवळ संशयास्पदरीत्या औषधांचा साठा असल्याची माहिती पोलिसांना मिळाली होती. त्यानुसार पोलिसांनी घटनास्थळी छापा टाकून कारवाई केली.
या कारवाईत Troikaa कंपनीच्या MEPHENTERMINE SULPHITE INJECTION IP या औषधाच्या २० बॉक्समधील १२० बाटल्या जप्त करण्यात आल्या. या बाटल्यांची किंमत सुमारे ४१ हजार ९३२ रुपये असल्याचे नमूद करण्यात आले आहे. तसेच TERMIVA कंपनीच्या त्याच औषधाच्या ५० बाटल्या जप्त करण्यात आल्या असून त्यांची किंमत सुमारे ४८ हजार ९३३ रुपये आहे. याशिवाय गुन्ह्यात वापरण्यात आलेली बुलेट मोटारसायकल देखील जप्त करण्यात आली असून तिची किंमत सुमारे २ लाख १ हजार ९३३ रुपये असल्याचे पोलिसांनी सांगितले. एकूण जप्त मुद्देमालाची किंमत सुमारे ३ लाख ९० हजार रुपयांपेक्षा अधिक असल्याचे प्राथमिक तपासात समोर आले आहे.

तपासादरम्यान पोलिसांना हे इंजेक्शन विनापरवाना आणि बेकायदेशीररीत्या विक्रीसाठी आणल्याचा संशय आहे. संबंधित औषध डॉक्टरांच्या चिठ्ठीशिवाय वापरणे धोकादायक मानले जाते. औषधाचा चुकीच्या पद्धतीने वापर केल्यास आरोग्यावर गंभीर परिणाम होऊ शकतात. त्यामुळे या औषधांच्या अवैध साठा आणि विक्रीबाबत पोलिसांनी अधिक तपास सुरू केला आहे.

या प्रकरणी करमाळा पोलीस ठाण्यात गुन्हा दाखल करण्यात आला असून गुन्हा क्रमांक १८८/२०२६ अंतर्गत भारतीय न्याय संहितेच्या कलम २७८, १२५, १२३ आणि ३(५) नुसार कारवाई करण्यात आली आहे.

सदर कारवाई पोलीस निरीक्षक रणजित माने यांच्या मार्गदर्शनाखाली करण्यात आली. त्यांच्या सूचनेनुसार पोलीस उपनिरीक्षक फुलचंद घायते यांनी पथकासह कुर्डुवाडी रोड परिसरात तपास मोहीम राबवली. चौकशीदरम्यान संशयितांकडून इंजेक्शनचा साठा जप्त करण्यात आला. पुढील तपासात या औषधांचा पुरवठा कोणाकडून होत होता, त्यामागे आणखी कोणाचा सहभाग आहे का आणि त्यांची विक्री कोणाला केली जाणार होती याचा शोध घेतला जात आहे.
पोलिसांनी अटक केलेल्या दोन्ही आरोपींची नावे अद्याप अधिकृतरीत्या जाहीर केलेली नसली तरी त्यांना न्यायालयात हजर करण्यात येणार असून पोलीस कोठडीची मागणी केली जाण्याची शक्यता आहे.

वैद्यकीय तज्ज्ञांच्या मते, MEPHENTERMINE INJECTION IP हे औषध मुख्यतः कमी रक्तदाब (Low Blood Pressure) असलेल्या रुग्णांसाठी वापरले जाते. मात्र काही ठिकाणी शारीरिक क्षमता वाढविण्यासाठी किंवा गैरवापरासाठी याचा वापर केला जातो. या औषधाचा अतिरेक झाल्यास गुंगी येणे, असंबद्ध बोलणे, भ्रम निर्माण होणे, आकडी येणे, हृदयाचे ठोके मंदावणे यांसारखे गंभीर दुष्परिणाम होऊ शकतात.

दरम्यान, करमाळा पोलिसांनी केलेल्या या कारवाईमुळे अवैध औषध विक्री करणाऱ्या टोळ्यांमध्ये खळबळ उडाली असून पुढील काही दिवसांत आणखी धक्कादायक माहिती समोर येण्याची शक्यता व्यक्त केली जात आहे. पोलिसांनी नागरिकांना अशा संशयास्पद हालचाली आढळल्यास तात्काळ माहिती देण्याचे आवाहन केले आहे.