सोलापूर विद्यापीठात प्रा. कविता म्हेत्रे यांच्या एकपात्री नाट्यप्रयोगाचे सादरीकरण
सोलापूर – पुण्यश्लोक अहिल्यादेवी होळकर सोलापूर विद्यापीठातर्फे सुरू असलेल्या पुण्यश्लोक अहिल्यादेवी होळकर त्रिशताब्दी जयंती सप्ताहांतर्गत आज मंगळवारी ‘मी अहिल्यादेवी होळकर’ या प्रभावी एकपात्री नाट्यप्रयोगाचे सादरीकरण उत्साहात पार पडले. सातारा येथील प्रसिद्ध कलाकार प्रा. कविता म्हेत्रे यांनी हा नाट्यप्रयोग रसिकांसमोर सादर केला. त्यांनी आपल्या प्रभावी आवाज, संवादशैली आणि उत्कृष्ट भूमिकेच्या सादरीकरणातून होळकरशाहीचा जाज्वल्य इतिहास, अहिल्यादेवींच्या लोककल्याणकारी कामांचा विस्तृत आढावा, तसेच त्यांच्या आदर्श राज्यकारभाराचे जिवंत दर्शन प्रेक्षकांसमोर उभे केले.
या कार्यक्रमाचे उद्घाटन विद्यापीठाचे माजी कुलगुरू डॉ. बाबासाहेब बंडगर यांच्या हस्ते झाले. अध्यक्षस्थानी कुलगुरू डॉ. प्रकाश महानवर हे होते. यावेळी प्र-कुलगुरू डॉ. लक्ष्मीकांत दामा, प्रभारी कुलसचिव डॉ. अतुल लकडे, पुण्यश्लोक अहिल्यादेवी होळकर अध्यासन केंद्राचे संचालक डॉ. प्रभाकर कोळेकर यांची प्रमुख उपस्थिती होती. कार्यक्रमाचे प्रस्ताविक विद्यार्थी विकास विभागाचे संचालक डॉ. केदारनाथ काळवणे यांनी केले, तर मान्यवरांचा परिचय डॉ. अनिल घनवट यांनी करून दिला.
नाट्यप्रयोगादरम्यान प्रा. कविता म्हेत्रे यांनी अहिल्यादेवींचे चरित्र, त्यांचा संघर्ष, प्रजेप्रती असलेले प्रेम, त्यांनी उभारलेली सामाजिक, धार्मिक आणि लोककल्याणकारी कामे, तसेच त्यांच्या दूरदर्शी आणि आदर्श राज्यकारभाराची झलक प्रभावीपणे मांडली. त्यांनी नाटकाद्वारे इतिहासातील महत्वाच्या घटना जिवंत केल्याने प्रेक्षकांना त्या काळातील राज्यव्यवस्था व अहिल्यादेवींचा करारी पण ममतामय स्वभाव यांचे दर्शन घडले.
यावेळी बोलताना माजी कुलगुरू डॉ. बंडगर म्हणाले, अहिल्यादेवी होळकर यांनी केलेले लोककल्याणकारी कार्य आजही समाजाला दिशा देणारे आहे. त्यांच्या कार्यातून प्रेरणा घेऊन समाजहिताच्या वाटचालीसाठी सर्वांनी पुढे यावे. त्यांनी अहिल्यादेवींच्या दानशूर वृत्ती, विहिरी, घाट, धर्मशाळा, मंदिरे आदी उपक्रमांची आजही समाज उपयोगी असलेली परंपरा अधोरेखित केली.
कुलगुरू डॉ. महानवर यांनी आपल्या अध्यक्षीय भाषणात सांगितले की, अहिल्यादेवींच्या कार्यातून शिकण्यासारखे खूप काही आहे. त्यांनी दाखवलेल्या आदर्श मार्गावरून विद्यार्थी आणि युवकांनी प्रेरणा घेत जीवनात सकारात्मक बदल घडवावेत. यावेळी व्यवस्थापन परिषदेचे सदस्य प्रा. देवानंद चिलवंत, वित्त व लेखाधिकारी सीए महादेव खराडे आदी उपस्थित होते. कार्यक्रमाचे सूत्रसंचालन डॉ. तेजस्विनी कांबळे यांनी केले, तर आभार प्रदर्शन सहाय्यक कुलसचिव डॉ. शिवाजी शिंदे यांनी मानले.
फोटो ओळी :
सोलापूर : पुण्यश्लोक अहिल्यादेवी होळकर सोलापूर विद्यापीठातर्फे ‘मी अहिल्यादेवी होळकर’ एकपात्री नाट्यप्रयोगाचे सादरीकरण झाले. यावेळी कुलगुरू डॉ. प्रकाश महानवर, माजी कुलगुरू डॉ. बाबासाहेब बंडगर, प्रा. कविता म्हेत्रे, प्र-कुलगुरू डॉ. लक्ष्मीकांत दामा, प्रभारी कुलसचिव डॉ. अतुल लकडे, अध्यासन केंद्राचे संचालक डॉ. प्रभाकर कोळेकर आदी.
