शेतकऱ्यांच्या मालाला योग्य दर मिळवून देण्याचा प्रत्येकाने प्रयत्न करावा – गोडबोले
सोलापूर – सध्याच्या परिस्थितीमध्ये शेतीमालाला भाव नाही. त्यामुळे शेतकरी हताश झालेला आहे. सोलापूर जिल्ह्यामध्ये आलेला महापूर आणि सध्या असलेले अवकाळीचे संकट यामुळे बाजारपेठेमध्ये शेतीमालाचे दर मोठ्या प्रमाणात कोसळले आहेत. त्यामधून शेतकऱ्यांना दिलासा देण्याकरिता समाजातील प्रत्येक व्यक्तीने प्रयत्न करणे गरजेचे असल्याचे मत समाजसेविका प्रियंवदा गोडबोले यांनी व्यक्त केले. कलिंगड खरबूज महोत्सवाच्या उद्घाटन प्रसंगी गोडबोले या बोलत होत्या. यावेळी गार्डन लवर्स परिवार, डॉ राजेंद्र लोणीकर , मनीषा शहा, वनिता भोसले उपस्थित होते. शेतकऱ्यांनी उत्पादन केलेल्या वेगवेगळ्या प्रकारच्या खरबूज आणि कलिंगडाची ग्राहकांना माहिती व्हावी. त्याची चव कळावी, म्हणून काल दिवसभर शहरातील एम्प्लॉयमेंट चौकामध्ये खरबूज कलिंगड आणि काशी भोपळा यांच्या डिश ग्राहकांना दिवसभर मोफत वाटण्यात आल्या होत्या.
खवय्या सोलापूरकरांनी काल दिवसभरामध्ये पाच ते सात टन खरबूज, कलिंगड फस्त केले. कलिंगड खरबूज आणि काशी भोपळा महोत्सवाचे सोलापूर मध्ये प्रथमच आयोजन करण्यात आले होते. सोलापूरकरांनी या महोत्सवाला मोठा प्रतिसाद दिला. शेतकऱ्यांनी उत्पादन केलेल्या मालाबद्दल माहिती जाणून घेतली. कलिंगडामध्ये काळ्यापाठीचे व आतून लाल रंग असलेली व्हरायटी आजपर्यंत ग्राहकापर्यंत पोहोचलेली आहे .मात्र. नोन यू सीड या कंपनीने आरोही नाव दिलेले पिवळ्या रंगाचे कलिंगड बाजारात आणलेले आहे .त्या कलिंगडाची चव ही अप्रतिम असून ग्राहकांना त्याबद्दल माहिती नसल्यामुळे त्याच्या खरेदीकडे दुर्लक्ष केले जात होते. मात्र अत्यंत चवदार असलेल्या या कलिंगडाची चव दस्तूर खुद्द सोलापूरकरांनी चाखल्यामुळे या कलिंगडाला मोठ्या प्रमाणात भविष्यात मागणी होईल आणि सोलापूर जिल्ह्यामधील शेतकऱ्यांना चांगले पैसे मिळतील अशी माहिती संयोजक विजय पवार यांनी दिली. या महोत्सवामध्ये कलिंगडाच्या शरयू आणि जन्नत, तर खरबुजाच्या मृदुला, कुंदन, बॉबी, या व्हरायटी मांडण्यात आल्या होत्या. हा महोत्सव यशस्वी करण्याकरिता गार्डन लवर्स ग्रुपचे एक हजार सदस्य सहभागी झाले होते. श्रीकिशन नेहरा, प्रकाश भुतडा, देवेश पाटील, सौरभ झांबरे, विजय पवार, शहा ऍग्रोचे राजस शहा यांनी परिश्रम घेतले. मिनी काशी भोपळा… या महोत्सवामध्ये एका कुटुंबाला पुरेल एवढा सरासरी अर्धा किलो वजनाचा मिनी काशी भोपळा या महत्त्वाचे आकर्षण ठरला होता. आतापर्यंत पाच ते सात किलो वजनाचा काशी भोपळा पाहण्यात आला होता .मात्र हा मिनी काशी भोपळा बाजारात आल्यामुळे छोट्या कुटुंबालाही तो खरेदी करता येईल.
