सोलापूर – महिला व बालविकास विभाग, महाराष्ट्र राज्य यांच्या वतीने तसेच सावित्रीबाई फुले शिक्षण प्रसारक मंडळ संचलित सिंहगड इन्स्टिट्यूट, केगाव सोलापूर यांच्या संयुक्त विद्यमाने पहिला राज्यस्तरीय चाचा नेहरू बालमहोत्सव 2025-26 चे आयोजन करण्यात आले आहे. हा तीन दिवसीय महोत्सव 28 ते 30 मार्च 2026 दरम्यान सिंहगड इन्स्टिट्यूटच्या प्रशस्त मैदानावर उत्साहात पार पडणार आहे. या महोत्सवात विविध क्रीडा व सांस्कृतिक स्पर्धांचा समावेश असून, धावणे, लांब उडी, रिले, कबड्डी, खो-खो यांसारख्या क्रीडा स्पर्धांसह चित्रकला, निबंध, वक्तृत्व, हस्ताक्षर आणि समूह नृत्य अशा विविध स्पर्धा आयोजित करण्यात आल्या आहेत. राज्यातील विविध जिल्ह्यांमधून सहभागी होणाऱ्या बालकांना त्यांच्या कला व क्रीडा कौशल्याचे प्रदर्शन करण्याची संधी या माध्यमातून उपलब्ध होणार आहे.
महोत्सवाचे उद्घाटन सावित्रीबाई फुले शिक्षण प्रसारक मंडळ, सिंहगड इन्स्टिटयुट केगाव, सोलापूर येथे शनिवार, दि. 28 मार्च रोजी सायंकाळी 5 वाजता होणार असून, महिला व बालविकास विभागाचे सचिव डॉ. अनुपकुमार यादव यांच्या हस्ते उद्घाटन पार पडणार आहे. कार्यक्रमाच्या अध्यक्षस्थानी आयुक्त नयना गुंडे राहणार असून, प्रमुख पाहुणे म्हणून जिल्हाधिकारी कुमार आशीर्वाद, मुख्य कार्यकारी अधिकारी कुलदीप जंगम, पोलीस आयुक्त एम. राजकुमार, पोलीस अधीक्षक अतुल कुलकर्णी तसेच सिंहगड इन्स्टिट्यूटचे कॅम्पस डायरेक्टर संजय नवले उपस्थित राहणार आहेत.
या महोत्सवात महिला व बालविकास विभागांतर्गत राज्यातील 36 जिल्ह्यांतील विविध बालगृहांमधील सुमारे 900 स्पर्धक सहभागी होणार असून, अधिकारी व कर्मचारी मिळून एकूण 1200 जणांचा सहभाग अपेक्षित आहे. तीन दिवस चालणाऱ्या या महोत्सवामुळे परिसरात उत्साहाचे वातावरण निर्माण होणार आहे.
या महोत्सवाचे नियोजन संजय माने (मुख्य कार्यक्रमाधिकारी तथा विभागीय उपआयुक्त, महिला व बालविकास, पुणे विभाग – नोडल अधिकारी) तसेच डॉ. विजय खोमणे (जिल्हा महिला व बालविकास अधिकारी) यांच्या मार्गदर्शनाखाली आयोजन करण्यात आले आहे.
