सोलापुरात स्वीकृत नगरसेवकासाठी भाजप राबवणार कोल्हापूर पॅटर्न ?.. अर्ज भरलेले गॅसवर

सोलापूर महानगरपालिकेच्या 10 इच्छुक नगरसेवकांसाठी आयुक्त कार्यालयाकडे तीन डझनहून अधिक इच्छुक उमेदवारांनी अर्ज भरले. भाजप आणि एमआयएम यांनी अधिकृतपणे आपले उमेदवार कोण याची नावे जाहीर केली नाही. त्यामुळे ज्यांनी अर्ज भरले ते गॅसवर असून याचा फैसला 20 फेब्रुवारी रोजी होणाऱ्या सभेतच होणार आहे. भाजपकडून शहराच्या रोहिणी तडवळकर, प्रभाकर जामगुंडे, जगदीश पाटील,शशी थोरात, अक्षय अंजीखाने,श्रीनिवास दायमा, सुधा अळीमोरे, वृषाली चालुक्य,केतन शहा, नागेश भोगडे, पांडुरंग दीड्डी, देवेंद्र भंडारे, साधना संगवे,आलोक खंडेलवाल , जवाहर जाजू,सुरज चव्हाण,महेश तापडिया, जयकृष्णा झंवर, श्रीकांत घाडगे,मल्लिनाथ येलटी, रुद्रेश बोरामणी, सचिन कुलकर्णी, जय साळुंखे,सोमनाथ केंगनाळकर, लक्ष्मीकांत दरग, परमेश्वर माळगे आदी सुमारे 30 जणांनी अर्ज भरले आहेत. एमआयएम कडून फिरदोस पटेल, नईम सालार, गाझी जहागीरदार यांनी अर्ज भरले आहेत. भाजपचे शहराध्यक्ष रोहिणी तडवळकर, पालकमंत्री जयकुमार गोरे, आमदार सुभाष देशमुख,आमदार विजयकुमार देशमुख, आमदार देवेंद्र कोठे ज्यांनी फोन करून काही जणांना उमेदवारी अर्ज भरण्यास शेवटच्या क्षणी सांगितले. इच्छुकांची संख्या खूप मोठ्या प्रमाणावर असल्यामुळे आता कोल्हापुरात ज्याप्रमाणे सव्वा -सव्वा वर्षासाठी स्वीकृत नगरसेवक निवडले गेले त्याचप्रमाणे सर्वांना खुश करण्यासाठी सोलापूर महापालिकेत देखील भाजप कोल्हापूर पॅटर्न राबवणार अशी चर्चा सुरू झाली आहे.