अक्कलकोटच्या पारंपारिक लढाईकडे राज्याचे लक्ष
माजी गृहराज्यमंत्री सिद्धाराम म्हेत्रे यांच्या राजकीय कारकीर्दीचा उतरता आलेख सुरू झाल्यानंतर भाजपाने मोदींच्या लाटेत जोरदार मुसंडी मारत अक्कलकोट काबीज केले.आज अक्कलकोट भाजपाचा अभेद्य बालेकिल्ला म्हणून ओळखला जातो.
सिद्धाराम म्हेत्रे यांनी काँग्रेसचा त्याग करत प्रथम भाजपाच्या लाटेवर स्वार होण्याचा निर्णय घेतला, परंतु राजकीय वादळात ही लाट अनुकूल नसल्याचे दिसताच उपमुख्यमंत्री एकनाथ शिंदे यांचे धनुष्यबाण हातात घेत राजकीय रणांगणात उतरण्याचा निर्णय घेतला आणि रणांगणात उतरले देखील!
नगरपरिषद आणि पंचायतीमध्ये भाजपाचे कमळ फुललेले असताना आता जिल्हा परिषद व पंचायत समितीच्या निवडणुका लागलेल्या आहेत.या निवडणुकीत भाजपा पुनरावृत्ती करेल की नवे शस्त्र हाती धरलेले सिद्धाराम म्हेत्रे आपल्या धनुष्यबाणातील अमोघ बाण सोडत भाजपाचा अभेद्य बालेकिल्ला भेदतील का, याकडे सर्वांचे लक्ष लागलेले आहे.
अक्कलकोट तालुक्यात काँग्रेस नाममात्र असून खरी लढत सत्ताधारी भाजपाचे आमदार सचिन कल्याणशेट्टी आणि शिंदेसेनेतील माजी गृहराज्यमंत्री सिद्धाराम म्हेत्रे यांच्यातच आहे.या निवडणुकीत कल्याणशेट्टी आणि म्हेत्रे यांनी परिवारातील सदस्यांना तिकीटरूपी वस्त्र दिल्याने ही निवडणूक प्रतिष्ठेची बनली आहे.
चपळगाव जिल्हा परिषद गटातून आमदार सचिन कल्याणशेट्टी यांनी अर्धांगिनी शांभवी कल्याणशेट्टी यांना रिंगणात उतरवले आहे, तर चपळगाव पंचायत समिती गणातून चुलत बंधू सागर कल्याणशेट्टी यांना षढ्ढू ठोकायला लावले आहे.दुसरीकडे सलगर जिल्हा परिषद गटातून सिद्धाराम म्हेत्रे यांनी आपले पुत्र शिवराज म्हेत्रे यांना धनुष्यबाण देत लढायला उभे केले आहे, तर तोळणूर पंचायत समिती गणातून कन्या शितल म्हेत्रे यांना लढवय्याची वस्त्रे प्रदान केली आहेत.
काँग्रेसचे अस्तित्व टिकून ठेवण्यासाठी काँग्रेसचे तालुकाध्यक्ष मल्लिकार्जुन पाटील यांची चुलत बहीण श्रुती पाटील पंचायत समिती गणातून, तर पूर्वी भाजपाच्या तंबुतील लढवय्ये सैनिक आनंद तानवडे तिकीटरूपी जहागिरदारी न मिळाल्याने आपल्या एकनिष्ठ समर्थकांसह कट्टर विरोधक असलेल्या शिंदेसेनेचे सेनापती म्हेत्रे यांच्या छावणीत दाखल झाले. आनंद तानवडेंचे चुलत बंधू प्रवीण तानवडे यांना वागदरी जिल्हा परिषद गटातून मोहिमेवर पाठवण्यात आले आहे.
अशाप्रकारे अक्कलकोट तालुक्यातील या निवडणुकीत ‘कुटुंब केंद्रीय राजकारण’ हा प्रचाराचा प्रमुख मुद्दा बनला आहे.भाजपाने जिल्हा परिषदेसाठी सहा उमेदवार देऊ केले असून पंचायत समितीत 12 उमेदवार निवडणूक लढवत आहेत.सिद्धाराम म्हेत्रे यांच्या नेतृत्वाखाली शिंदेसेनेचे जिल्हा परिषदेत चार तर पंचायत समितीमध्ये आठ उमेदवार रिंगणात आहेत.काँग्रेसकडून जिल्हा परिषदेसाठी एक तर पंचायत समितीसाठी दोन उमेदवार नशीब आजमावत आहेत.तर दिवंगत अजित पवार यांच्या राष्ट्रवादी गटाकडून जिल्हा परिषदेत एक तर पंचायत समितीमध्ये दोन उमेदवार रिंगणात आहेत.एकंदरीत अक्कलकोटमधील ही जिल्हा परिषद आणि पंचायत समितीची निवडणूू सचिन कल्याणशेट्टी आणि सिद्धाराम म्हेत्रे यांच्या प्रतिष्ठेची लढाई म्हणून पाहिली जात आहे.
