सोलापूर : सोलापूर शहरात आगामी निवडणुकांच्या पार्श्वभूमीवर अवैध शस्त्रांचा वापर रोखण्यासाठी पोलिस आयुक्तांच्या आदेशानुसार गुन्हे शाखेने विशेष मोहीम हाती घेतली आहे. या मोहिमेत गुन्हे शाखेच्या पथकाने मोठी कारवाई करत तीन इसमांना अटक करून त्यांच्याकडून अवैध शस्त्रसाठा जप्त केला आहे. अशी माहिती पोलीस आयुक्त एम राजकुमार यांनी दिली . दिनांक ११ जानेवारी २०२६ रोजी गुन्हे शाखेला गोपनीय माहिती मिळाली होती की, डी.आर.एम. रेल्वे ऑफिसजवळील रेल्वे कॉलनीच्या कंपाउंडलगत मोकळ्या जागेत काही इसम संशयास्पदरीत्या थांबले असून त्यांच्याकडे देशी बनावटीची पिस्तुले आहेत. या माहितीच्या आधारे वरिष्ठ पोलिस निरीक्षक अरविंद माने यांच्या मार्गदर्शनाखाली सहा.पोलीस निरीक्षक दत्तात्रय काबे व त्यांच्या पथकाने सापळा रचून कारवाई केली. कारवाईदरम्यान काळ्या रंगाच्या युनिकॉर्न मोटारसायकलवरून आलेल्या तीन इसमांना ताब्यात घेण्यात आले. चौकशीत त्यांची नावे पुढीलप्रमाणे निष्पन्न झाली – महंमदरफिक लालसाब जाटगर (वय २६, व्यवसाय – मजुरी, रा. जाटगर वस्ती, अलमेल, ता. सिंदगी, जि. विजयपूर, कर्नाटक) राजा गुरुनाथ सौदागर (वय २६, व्यवसाय – बेकार, रा. भारत नगर, अलमेल, ता. सिंदगी, जि. विजयपूर, कर्नाटक) प्रदीप सूर्यकांत काळमोर (वय ३५, व्यवसाय – मेकॅनिक, रा. इंदिरा नगर, कडम वस्ती, लोणी काळभोर, पुणे) झडतीदरम्यान आरोपी राजा सौदागर याच्या कंबरेजवळ लपवलेले एक देशी बनावटीचे पिस्तूल व ५ जिवंत काडतुसे, तर प्रदीप काळमोर याच्याकडून एक देशी बनावटीचे पिस्तूल व ३ जिवंत काडतुसे मिळून आली. तसेच गुन्ह्यात वापरलेली होंडा कंपनीची युनिकॉर्न मोटारसायकलही जप्त करण्यात आली.
या तिघांकडे शस्त्र परवाना नसल्याचे निष्पन्न झाले असून, सदर शस्त्रे विक्रीच्या उद्देशाने बाळगल्याचे तपासात समोर आले आहे. याप्रकरणी बाजार पोलीस ठाणे, सोलापूर शहर येथे गु. र. नं. २८/२०२६ भारतीय हत्यार कायदा कलम ३/२५ तसेच महाराष्ट्र पोलीस अधिनियम कलम १३५ अन्वये गुन्हा दाखल करण्यात आला आहे. या कारवाईत एकूण २ देशी बनावटीची पिस्तुले, ८ काडतुसे व मोटारसायकल असा सुमारे २ लाख १६ हजार रुपयांचा मुद्देमाल जप्त करण्यात आला आहे. ही कारवाई पोलीस आयुक्त एम. राजकुमार, सहपोलीस आयुक्त डॉ. अश्विनी पाटील, पोलीस उपआयुक्त राजन माने, सहा. पोलीस आयुक्त गुन्हे अरविंद माने यांच्या मार्गदर्शनाखाली करण्यात आली. गुन्हे शाखेचे अधिकारी व अंमलदार संताजी रोकडे, अनिल जाधव, महेश शिंदे, भारत पाटील, कुमार शेलके, राजू मुंडाळ, महेश रोकडे, अंकुश मोसले, सुभाष मुंडे, सिद्धराम देशमुख, राजेश मोरे, अजय गुंड, सागर पाटील, कडील प्रकाश गायकवाड, मच्छिंद्र राठोड, चालक सतीश काटे, बाळू काळे यांनी ही कारवाई यशस्वी केली.
