सोलापुरात ‘मुका’ प्रचार..उमेदवारांच्या शेकडो रिक्षा इंद्रभुवनात..!

महापालिका निवडणुकीसाठी राज्य निवडणूक आयोगाने आजवर जसा घोळात घोळ घातला आहे, त्याच्या पावलावर पाऊल ठेवून सोलापूर महापालिका प्रशासन देखील भावी नगरसेवकांना त्रास देणे सुरूच ठेवले आहे. अगोदर एनओसी मिळवण्यासाठी इच्छुक उमेदवारांची गेल्या आठवड्यात दमछाक झाली. आता उमेदवारी फिक्स झाली मात्र महापालिकेकडून प्रचाराची ऑडिओ क्लिप आणि रिक्षा परवाने देण्यास प्रचंड विलंब लावला जात आहे. त्यामुळे एक खिडकी योजनेचा बोजवारा उडाला आहे. यामध्ये सुसूत्रता नाही. म्हणून उमेदवारांच्या डिजिटल छबी आणि स्पीकर लावलेल्या शेकडो रिक्षा महापालिकेच्या इंद्रभुवन आवारात सकाळपासून सायंकाळपर्यंत उभ्या होत्या. त्यामुळे शहरातील सर्वच प्रभागात सध्या मुका प्रचार सुरू आहे. आरटीओकडून रिक्षाची कागदपत्रे चेक करणे, त्यानंतर निवडणूक निर्णय अधिकाऱ्याकडून रिक्षाचा परवाना घेणे.. माध्यम कक्षाकडून ऑडिओ क्लिप सर्टिफाय करून घेणे, पोलिसांकडून स्पीकरचा परवाना घेणे अशा सर्व बाबी तपासणीची प्रक्रिया किचकट असल्यामुळे प्रचाराला अवघे सातच दिवस शिल्लक राहिले तरीही अवघ्या पंधरा-वीस रिक्षांनाच सोमवारी दुपारपर्यंत प्रचाराचे परवाने देण्यात आले होते. महापालिकेत रिक्षांची प्रचंड गर्दी झाली तर उशिरा आलेल्या रिक्षांना नॉर्थकोट प्रशालेच्या मैदानावर पार्किंग करण्यास सांगितले. एकूणच इंद्रभुवन इमारती समोर सोमवारी निवडणुकीच्या मैदानातील 564 उमेदवारांचे एकत्रित दर्शन रिक्षा परवाण्याच्या माध्यमातून पाहून अनेक जण आश्चर्य व्यक्त करत होते.