आयटीएफ टेनिस स्पर्धेत भारताच्या वैदेही चौधरी व मिचिका ओझेकी यांच्यात अंतिम लढत

जामश्री – इलिझियम सोलापूर ओपन 2025 महिलांच्या $ 30,000/- रकमेच्या आयटीएफ टेनिस स्पर्धेत भारताच्या वैदेही चौधरी व मिचिका ओझेकी यांच्यात अंतिम लढत

दुहेरीत भारताच्या वैष्णवी आडकर व अंकिता रैना यांना विजेतेपद

सोलापूर – महाराष्ट्र राज्य लॉन टेनिस संघटना व सोलापूर जिल्हा लॉन टेनिस असोसिएशन(एसडीएलटीए) यांच्या संयुक्त विद्यमाने आयोजित केलेल्या ओॲसिस, प्रिसीजन, इलिझियम-जामश्री व बालाजी अमाईन्स पुरस्कृत जामश्री – इलिझियम सोलापूर ओपन 2025 महिलांच्या $30,000/- रकमेच्या आयटीएफ टेनिस स्पर्धेत एकेरीत उपांत्य फेरीत वैदेही चौधरी, जपानच्या मिचिका ओझेकी यांनी आपापल्या प्रतिस्पर्धी संघांचा पराभव करून अंतिम फेरीत प्रवेश केला. दुहेरीत भारताच्या वैष्णवी आडकर व अंकिता रैना यांनी विजेतेपद संपादन केले.

एमएसएलटीए टेनिस सेंटर, जिल्हा क्रीडा संकुल, कुमठा नाका, सोलापूर येथे सुरू असलेल्या या स्पर्धेत मुख्य ड्रॉमध्ये एकेरीत उपांत्य फेरीत पहिल्या सामन्यात सहाव्या मानांकित भारताच्या वैदेही चौधरी हिने आठव्या मानांकित भारताच्या वैष्णवी आडकरचा 6-4, 6-2 असा सहज पराभव करून अंतिम फेरी गाठली. हा सामना 1तास 3मिनिटे चालला.

दुसऱ्या उपांत्य फेरीच्या चुरशीच्या सामन्यात जपानच्या मिचिका ओझेकी हिने भारताच्या दुसऱ्या मानांकित श्रीवल्ली रश्मिका भामिदिप्तीचा 4-6, 6-4, 6-4 असा तीन सेटमध्ये संघर्षपूर्ण पराभव करून अंतिम फेरीत धडक मारली. हा सामना 1तास 53मिनिटे चालला

दुहेरीत अंतिम फेरीत दुसऱ्या मानांकित भारताच्या वैष्णवी आडकर व अंकिता रैना या जोडीने भारताच्या झील देसाई व रशियाच्या एलिना नेपली यांचा 4-6, 7-5, 10-6 असा पराभव करून विजेतेपद संपादन केले.

स्पर्धेतील दुहेरीतील विजेत्या जोडीला करंडक व आयटीएफ गुण देण्यात आले. स्पर्धेचे पारितोषिक वितरण डॉ सुहासिनी शहा, डॉ शंतनू गांधी, एमएसएलटीएचे सह सचिव राजीव देसाई, नितीन कन्नमवार यांच्या हस्ते करण्यात आले.

निकाल: मुख्य ड्रॉ: उपांत्य फेरी: एकेरी:
वैदेही चौधरी(भारत)[6] वि.वि.वैष्णवी आडकर(भारत)[8] 6-4, 6-2;
मिचिका ओझेकी (जपान)वि.वि.श्रीवल्ली रश्मिका भामिदिप्ती(भारत)[2]4-6, 6-4, 6-4;

दुहेरी: अंतिम फेरी:
वैष्णवी आडकर [2] /अंकिता रैना(भारत)वि.वि. झील देसाई (भारत)/एलिना नेपली 4-6, 7-5, 10-6.