सोलापूर – राष्ट्रीय शिक्षण धोरण २०२० च्या अनुषंगाने राज्यातील शाळांमध्ये त्रिभाषा धोरण निश्चित करण्याकरिता शिक्षणतज्ज्ञ डॉ. नरेंद्र जाधव यांच्या अध्यक्षतेखाली गठित करण्यात आलेली समिती सोलापूर जिल्ह्याच्या दौऱ्यावर येत आहे. त्रिभाषा सूत्राची अंमलबजावणी कोणत्या इयत्तेपासून व कशाप्रकारे करायची, याविषयीचे धोरण निश्चित करण्यासाठी ही समिती शुक्रवार दिनांक २१ नोव्हेंबर २०२५ रोजी सोलापूर जिल्ह्याला भेट देणार आहे.
समितीच्या दौऱ्या दरम्यान विविध स्तरावरील संबंधितांशी संवाद साधून त्यांची मते व विचार जाणून घेण्यात येणार आहेत. यासाठी दिनांक २१ नोव्हेंबर २०२५ रोजी सकाळी ठीक १० वाजता जिल्हा नियोजन भवन सभागृह येथे एका महत्त्वाच्या चर्चासत्राचे आयोजन करण्यात आले आहे. या चर्चासत्रामध्ये सामान्य नागरिक, भाषातज्ञ, विचारवंत, मराठी भाषेशी संबंधित संस्थांचे प्रतिनिधी, राजकीय पक्षांचे नेते लोकप्रतिनिधी, शिक्षक संघटनांचे पदाधिकारी, पालक-शिक्षक संघटनांचे पदाधिकारी तसेच आंदोलनकर्ते यांच्याशी समिती थेट संवाद साधणार आहे. यासाठी प्रश्नावली व मतावली देखील तयार करण्यात आली आहे.
समितीच्या दौऱ्याच्या नियोजनासाठी दिनांक १४ नोव्हेंबर रोजी जिल्हा परिषदेच्या शिवरत्न सभागृहात बैठक घेण्यात आली. या बैठकीत प्राचार्य, डायट वेळापूर, शिक्षणाधिकारी (प्राथमिक), शिक्षणाधिकारी (माध्यमिक) व शिक्षणाधिकारी (योजना) यांच्या समन्वयाने आवश्यक पूर्वतयारी व नियोजन करण्यात आले आहे. सोलापूर शहर व जिल्ह्यातील तज्ज्ञ व्यक्तींचा सहभाग वाढवण्यासाठी सर्व गटशिक्षणाधिकारी व महानगरपालिका, नगरपालिका शिक्षण मंडळांना सूचना देण्यात आल्या आहेत. या चर्चासत्रात सुमारे ३०० जणांचा सहभाग अपेक्षित आहे. सोलापूर जिल्ह्यातील सर्व संबंधितांनी नियोजित चर्चासत्रासाठी दिनांक २१ नोव्हेंबर रोजी सकाळी १० वाजता जिल्हा नियोजन भवन येथे उपस्थित राहावे, असे आवाहन प्राथमिक विभागाचे शिक्षणाधिकारी कादर शेख यांनी केले आहे.
