विरोधकांमधील तुल्यबळ नेत्यांना भाजपमध्ये घेण्यासाठी मुख्यमंत्री देवेंद्र फडणवीस पालकमंत्री जयकुमार गोरे यांनी चंगच बांधला आहे. गेल्याच आठवड्यात माजी आमदार राजन पाटील, यशवंत माने यांच्यासह माजी आमदार बबनराव शिंदे यांच्या कुटुंबीयांचा भाजपमध्ये प्रवेश झाला. सोलापूरचे दोन माजी मंत्री आमदार सुभाष देशमुख आणि आमदार विजयकुमार देशमुख यांना देखील भाजपने चांगलेच टेन्शन दिले आहे. सोलापूर शहर उत्तर मधील आमदार विजयकुमार देशमुख यांच्या सर्व विरोधकांना भाजपमध्ये प्रवेश देण्यात आला आहे. तशीच परिस्थिती दक्षिण सोलापूरची असून आता आमदार सुभाष देशमुख यांची विरोधक दिलीप माने यांचा लवकरच प्रवेश आहे. आमदार सुभाष देशमुख आणि आमदार विजयकुमार देशमुख यांनी याबाबत भाजप विरोधात भूमिका घेऊन शहराध्यक्ष रोहिणी तडवळकर यांना हैराण केले आहे.
आता या दोन देशमुखांसोबत भाजपने अकलूजच्या मोहिते पाटलांना देखील टेन्शन देणे सुरू केले आहे. मोहिते पाटलाचे कित्येक वर्षाचे विरोधक आणि माळशिरसचे माजी आमदार स्वर्गीय शामराव पाटील यांची पुत्र तसेच काँग्रेसचे माजी जिल्हाध्यक्ष प्रकाश पाटील यांचा आता शुक्रवारी भाजपामध्ये प्रवेश होणार आहे. मोहिते पाटलांचे वेळापूर मधील विरोधक माने – देशमुख यांनी भाजपमध्ये प्रवेश केला आहे . अकलूज मधील फत्तेसिंह माने पाटील बंधूंनी देखील भाजपमध्ये प्रवेश करण्यासाठी मुख्यमंत्री देवेंद्र फडणवीस यांची भेट घेतली. आता पाणीवचे काँग्रेसचे बडे नेते प्रकाश पाटील यांच्या पक्षप्रवेशासाठी भाजपचे प्रदेशाध्यक्ष रवींद्र चव्हाण ,जेष्ठ मंत्री राधाकृष्ण विखे पाटील, पालकमंत्री जयकुमार गोरे यांच्या उपस्थितीत शुक्रवारी मोठे शक्तिप्रदर्शन केले जाणार आहे. त्यामुळे भाजपने सोलापूर शहरातील दोन माजी मंत्र्यांसमवेत आता मोहिते पाटील कुटुंबीयांना देखील टेन्शन देणे सुरू केले आहे. त्यामुळे जिल्ह्यातील राजकारणात उलथापालत होणार हे नक्की
