सोलापूर – “माझं सोलापूर – स्वच्छ सोलापूर, सुंदर सोलापूर” या मोहिमेच्या अनुषंगाने महापालिका आयुक्त डॉ. सचिन ओम्बासे यांनी आज शहरातील विविध भागात प्रत्यक्ष पाहणी केली.यावेळी अतिरिक्त आयुक्त विना पवार, सह. आयुक्त शशिकांत भोसले,सार्वजनिक आरोग्य अभियंता व्यंकटेश चौबे ,मुख्य सफाई अधीक्षक नागनाथ बिराजदार ,अंतर्गत लेखा परीक्षक राहुल कुलकर्णी, विभागीय अधिकारी उपस्थिती होते. यावेळी आयुक्त डॉ. सचिन ओम्बासे यांनी सिव्हिल चौक येथे सुरू असलेल्या स्वच्छता मोहिमेमध्ये सामील झाले.
यावेळी आयुक्त यांनी फ़ॉरेस्ट येथील भाजी मार्केट,सिव्हिल हॉस्पिटल, vip रोड, सात रस्ता, गांधी नगर, अशा परिसरांना भेट देऊन त्यांनी घरोघरी घंटागाडी जाते का, कचरा संकलन नियमित होते, तसेच सार्वजनिक शौचालय या ठिकाणी पाण्याची सोयी बाबत पाहणी केली. यावेळी फुटपाथवर वाढलेले गवत व काही ठिकाणी रस्त्यावर कचरा साचलेला आढळून आला.
या पार्श्वभूमीवर आयुक्त डॉ. ओम्बासे यांनी रस्त्यावर कचरा टाकणाऱ्या नागरिकांवर दंडात्मक कारवाई करण्याचे आदेश दिले. तसेच ज्या ठिकाणी घंटागाडी असूनही कचरा सार्वजनिक ठिकाणी टाकला जातो, तेथे संबंधित आरोग्य निरीक्षक व सफाई कर्मचाऱ्यांवर कारवाई करण्याचेही निर्देश दिले.रस्त्याच्या दुतर्फी मार्गावरती वाढलेले गवत, वेली काढण्याबाबत संबंधितांना सूचना दिले.आठवड्यातून प्रत्येक शुक्रवारी व शनिवारी गवत उचलणे व माती काढण्याबाबत स्वतंत्र मोहीम घेण्याबाबत सूचना दिले.
नागरिकांना आवाहन
महानगरपालिकेच्या वतीने नागरिकांना आवाहन करण्यात आले आहे की :
कचरा रस्त्यावर किंवा फुटपाथवर टाकू नये.
घरगुती कचरा फक्त घंटागाडीमध्येच द्यावा.
दुबाजक व सार्वजनिक ठिकाणे स्वच्छ ठेवावीत.
“आपलं शहर – आपली जबाबदारी, स्वच्छ सोलापूर – सुंदर सोलापूर” हा संदेश प्रत्येकाने आचरणात आणावा, असे आयुक्त डॉ. सचिन ओम्बासे यांनी आवाहन केले आहे.
