सोलफुल सोलापूर उपक्रमांतर्गत पर्यटन विकास कार्यशाळेचे उद्घाटन

कृषी पर्यटन, निवासस्थाने आणि जागतिक पर्यटन सप्ताहाची रूपरेषा
सोलापूर, दि. 7 (जिमाका) :- सोलफुल(Soulful) सोलापूर उपक्रमांतर्गत आयोजित पर्यटन विकास कार्यशाळेचे उद्घाटन आमदार सुभाष देशमुख यांच्या प्रमुख उपस्थितीत झाले.

या कार्यशाळेत जिल्हा कृषी अधीक्षक अधिकारी शुक्राचार्य भोसले, पुणे विभागाचे पर्यटन समन्वयक अधिकारी सूर्यकांत भुजबळ, पर्यटन उपसंचालक कुंभार मॅडम, पर्यटन प्रकल्प अधिकारी मयूर नांगरे, सहाय्यक पर्यटन अधिकारी गुणवंत पवार, जिल्हा उपनिबंधक सहाय्यक आबासाहेब गावडे, पर्यटन विभाग महाराष्ट्र शासन मान्यता प्राप्त कृषी पर्यटन केंद्र संचालक समिती अध्यक्ष लहू अवताडे,जिल्हा अग्रणी बँक व्यवस्थापक राम वर्खडे यांच्यासह अनेक मान्यवर उपस्थित होते.
यावेळी आमदार सुभाष देशमुख यांनी चिंचणी गावाच्या पर्यटन विकासाचा यशस्वी अनुभव सांगत”आई योजना” अंतर्गत महिलांना व्यवसायासाठी कर्ज उपलब्ध करून देण्याची माहिती दिली. त्यांनी जिल्हा परिषद शाळांमधील विद्यार्थ्यांना ऐतिहासिक स्थळांना भेटी देण्याचे आवाहन केले. कुडल येथील 800 वर्षांपूर्वीच्या शिलालेखासारख्या ठिकाणांची माहिती जनतेपर्यंत पोहोचवण्याचे महत्त्व अधोरेखित केले. पर्यटन सप्ताहात व्यापाऱ्यांनी सवलतीच्या दरात सेवा देण्याचे आवाहन त्यांनी केली.

जिल्हा अध्यक्ष कृषी अधिकारी शुक्राचार्य भोसले यांनी कृषी पर्यटन योजनेच्या माध्यमातून शेततळे, फळबाग, नर्सरीसाठी सहाय्य उपलब्ध असल्याचे सांगितले. त्यांनी शाश्वत शेतीच्या संकल्पनेवर भर देत जमिनीची सुपीकता राखण्याच्या गरजेवरही प्रकाश टाकला.
पुणे विभागाचे पर्यटन अधिकारी अभिजीत उघडे यांनी निवासस्थानांच्या विविध प्रकारांची माहिती दिली. त्यात स्थानिक कुटुंबासोबत राहण्याची संकल्पना, वेकेशन होम, पर्यटक व्हिला आणि पर्यटक अपार्टमेंट यांचा समावेश होता. महा बुकिंग प्रणालीवर व्यवसायाची नोंदणी करून प्रमाणपत्र मिळवता येईल, असेही त्यांनी स्पष्ट केले.

कार्यशाळेत उपस्थित उद्योजकांनी जल पर्यटनातील बोटींची मागणी, नर्सरी नोंदणी प्रक्रिया आणि शेती परिसरातील निवासस्थाने उभारण्यासाठी कर्ज योजनांबाबत प्रश्न विचारले. काही निवासस्थाने हायवेपासून अर्धा किलोमीटर अंतरावर असून, तेथे विदेशी पर्यटकही भेट देत असल्याचे एका घरमालकाने सांगितले.

या कार्यशाळेच्या माध्यमातून सोलापूर जिल्ह्यातील पर्यटन, कृषी आणि महिला उद्योजकता यांना नवी दिशा मिळणार असून, पर्यटन सप्ताहाच्या आयोजनामुळे जिल्ह्याचा सांस्कृतिक आणि आर्थिक विकास अधिक गती घेईल, असा विश्वास व्यक्त करण्यात आला.
प्रारंभी पर्यटन समन्वयक श्री. भुजबळ यांनी प्रास्ताविक केले. यात 27 सप्टेंबर 2025 रोजी जागतिक पर्यटन दिवस साजरा करण्याच्या अनुषंगाने 27 सप्टेंबर ते 2 ऑक्टोबर दरम्यान पर्यटन सप्ताह साजरा केला जाणार असल्याची माहिती दिली. या सप्ताहात सोलापूर जिल्ह्यातील प्रमुख पर्यटन स्थळांना भेटी देण्यात येणार असून, पर्यटन दिंडीचे आयोजनही करण्यात येणार आहे. कृषी पर्यटन केंद्रांमुळे ग्रामपंचायतींना आर्थिक लाभ होत असल्याचे त्यांनी नमूद केले. सोलापूर जिल्ह्यासह धाराशिव जिल्ह्यातील पर्यटन व्यवसायिकांनी उत्स्फूर्त प्रतिसाद दिला.