करिअर घडविताना ध्येय आणि दिशा निश्चित केली पाहिजे, यशाकडे जाण्यासाठी सकारात्मक दृष्टिकोन बाळगून कौशल्ये विकसित केली पाहिजेत, ज्ञान व एकाग्रतेचा सहाय्याने उद्योगांमध्ये उतरुन महिलांनी आर्थिकदृष्ट्या स्वावलंबी होऊन सक्षम समाजासाठी योगदान द्यावे असे प्रतिपादन जिल्हा उद्योग केंद्राचे प्रकल्प अधिकारी राजशेखर शिंदे यांनी केले. ते देशस्थ ऋग्वेदी ब्राह्मण शिक्षणात्तेजक संस्था महिला शाखा व ल.गो.काकडे एज्युकेशनल फौडेशन सोलापूर तर्फे सरस्वती चौक येथील सेवासदन प्रशालेत आयोजित केलेल्या युवती प्रबोधन शिबीरात ‘युवतींसाठी उद्योगाच्या संधी’ या विषयावर प्रमुख पाहुणे म्हणून बोलत होते. व्यासपीठावर संस्थेचे अध्यक्ष डाॅ.श्रीकांत येळेगावकर, उपाध्यक्ष दत्तात्रय आराध्ये, काकडे फाउंडेशनच्या अलका काकडे उपस्थितीत होते. अध्यक्ष स्थानी महिला शाखेच्या अध्यक्षा कु.हेमा चिंचोळकर होत्या. प्रारंभी स्वागत व प्रास्ताविक डाॅ.नभा काकडे यांनी केले. रोपाला पाणी घालून कार्यक्रमाचे उदघाटन करण्यात आले. आभार क्षितीजा गाताडे यांनी मानले तर सूत्रसंचालन प्रा.शुभदा कुलकर्णी यांनी केले.
प्रबोधन शिबिरामध्ये अलका काकडे व मानसी कुलकर्णी यांनी बौद्धिक गेम्सद्वारे युवतींना मानसिक आरोग्याचे ज्ञान दिले.
डाॅ.श्रुती वडगबाळकर यांनी वाचनसंस्कृती विकसीत करण्यासाठी प्रबोधन केले. क्षितीजा गाताडे यांनी कागदी फुले व हार तयार करण्याचे हस्तकला कौशल्याचे प्रशिक्षण दिले तर समारोपाच्या अखेरच्या सत्रात अँड. मंगला जोशी (चिंचोळकर) यांनी महिला विषयक कायद्याची माहिती दिली. सत्तर युवतीं व वीस महिलांनी या प्रबोधन शिबीराचा लाभ घेतला.
