सोलापूर – सोलापूर स्थित प्रिसिजन कॅमशॉफ्ट लिमिटेड या कंपनीला ग्रीन एन्व्हायरो फाउंडेशन दिल्ली यांच्या वतीने सेफ्टी एक्सलन्ससाठी प्लॅटिनम आणि गोल्ड या नामांकित पुरस्काराने सन्मानित करण्यात आले आहे. हा पुरस्कार कर्मचाऱ्यांच्या आणि कामगारांच्या सुरक्षिततेसाठी कंपनीची वचनबद्धता आणि कामगिरी दर्शवतो.
एनटीपीसी, रिलायन्स, एनएमडीसी, ओएनजीसी आणि इतर प्रतिष्ठित उद्योगांमधील माजी सर्वोच्च वरिष्ठ संचालकाद्वारे संपूर्ण भारतात प्रशिक्षण, मार्गदर्शन आणि ज्ञान सामायिकरणासाठी सुरू केलेला हा प्रतिष्ठित पहिला पुरस्कार दिल्ली येथील ग्रीन एन्व्हायरो फाउंडेशनने दिला आहे. ग्रीन एन्व्हायरो फाउंडेशन ही एक समर्पित संस्था आहे जी प्रभावी कार्यक्रम आणि उपक्रमांद्वारे पर्यावरणीय शाश्वततेला प्रोत्साहन देण्यावर लक्ष केंद्रित करते.
या पुरस्काराच्या पहिल्या फेरीनंतर प्रिसिजनची व्हर्च्युअल मुलाखतीसाठी निवड केली आणि नंतर सर्व ज्युरी सदस्यांनी या प्रतिष्ठित सेफ्टी एक्सलन्स प्लॅटिनम आणि गोल्ड पुरस्कार – २०२५ साठी प्रिसिजनला निवडले.
कंपनीमधील सुरक्षा संस्कृती व कार्यपद्धतीमुळे सुरक्षेमधील प्रिसिजनने बेंचमार्क निर्माण केले आहेत. हा पुरस्कार मिळणे हे उत्पादनाच्या गुणवत्तेसह सुरक्षा संस्कृती व कार्यसंस्कृती मध्ये प्रिसिजनचे सातत्य दर्शवते.
प्रिसिजनने मागील ३० वर्षापासून सर्वोत्कृष्ट गुणवत्ता, कस्टमर फोकस कामातील अचूकपणा हीच आपली ओळख बनविली आहे. प्रिसिजन डीएनए आणि कार्यसंस्कृतीमुळे कॅमशाफ्ट उत्पादनातील अग्रगण्य उत्पादन कंपनी म्हणून प्रिसिजनची जगात ओळख निर्माण झाली आहे. दि. ११ जानेवारी रोजी दिल्ली येथे पार पडलेल्या समारंभात हा पुरस्कार प्रदान करण्यात आला. प्रिसिजन कंपनीच्या वतीने कंपनीचे वरिष्ठ सेफ्टी मॅनेजर श्री सुहास पाटील यांनी हा पुरस्कार स्विकारला.
