सोलापूर : जनता बैंक कर्मचारी सांस्कृतिक गणेशोत्सवानिमित्त मंडळातर्फे बौद्धिक व्याख्यानमालेचे आयोजन करण्यात आल्याची माहिती मंडळाचे गणेशोत्सव समितीचे अध्यक्ष लक्ष्मण सुतार यांनी पत्रकार परिषदेत दिली. १३ ते १६ सप्टेंबर दरम्यान दररोज सायंकाळी सात वाजता हुतात्मा स्मृती मंदिरात ही व्याख्यानमाला होणार आहे. अभिनेते सुबोध भावे, माजी पोलिस महासंचालक भूषणकुमार उपाध्याय यांच्यासह मान्यवर वक्त्यांची व्याख्याने होणार आहेत.
या व्याख्यानमालेचे उद्घाटन शुक्रवार, १३ सप्टेंबरला सायंकाळी सात वाजता सोलापूरचे पोलिस आयुक्त एम. राजकुमार यांच्या हस्ते होईल. पहिल्या दिवशी अभिनेते सुबोध भावे यांची प्रकट मुलाखत निवेदिका मंजूषा गाडगीळ घेणार आहेत.
शनिवार, दि. १४ सप्टेंबरला महाराष्ट्र शासनाच्या उच्च शिक्षण संचालनालयाचे संचालक डॉ. शैलेंद्र देवळाणकर हे “विकसित भारताचे उद्दिष्ट आणि शिक्षणाची भूमिका” या विषयावर मार्गदर्शन करतील. ज्येष्ठ पत्रकार भाउ तोरसेकर रविवार, १५ सप्टेंबरला “कायदा, व्यवस्था आणि लोकशाही” या विषयावर ते सोलापूरकरांना मार्गदर्शन करणार आहेत. व्याख्यानमालेचा शेवट माजी पोलिस महासंचालक भूषणकुमार उपाध्याय यांच्या व्याख्यानाने होणार आहे.
सोमवार, १६ सप्टेंबरला उपाध्याय ताणतणाव व मानसिक स्वास्थ्य या विषयावर व्याख्यान देणार आहेत. या पत्रकार परिषदेस सोलापूर जनता सहकारी बँकेचे अध्यक्ष सुनील पेंडसे, उपाध्यक्ष अॅड. मिलिंद कुलकर्णी, तज्ज्ञ संचालक अॅड. प्रदीपसिंह राजपूत, संचालक जगदीश भुतडा, पुरुषोत्तम उडता, आनंद कुलकर्णी, संचालिका चंद्रिका चौहान, बोर्ड ऑफ मॅनेजमेंट सदस्य डॉ. अजितकुमार देशपांडे, तसेच मंडळाचे विश्वस्त व पदाधिकारी उपस्थित होते.
