सोलापूर l विद्यापीठ व महाविद्यालयीन शिक्षकेतर कर्मचाऱ्यांचा गुरुवारी १६ फेब्रुवारी रोजी होणारा एक दिवसाचा लाक्षणिक संप अटळ असल्याचे, महाराष्ट्र राज्य विद्यापीठ व महाविद्यालय सेवक संयुक्त कृती समितीने मुंबईतून जाहीर केले आहे.
मुंबईत बुधवारी संयुक्त कृती समितीचे पदाधिकारी यांच्याबरोबर उपमुख्यमंत्री व वित्तमंत्री देवेंद्र फडणवीस यांच्याशी अंत्यत सकारात्मक चर्चा झाली. परंतु अद्याप याचे इतिवृत्त मिळाले नाही आणि त्यातील मजकूर कळलेला नाही. त्यामुळे नियोजित टप्प्यानुसार सुरु असलेले आंदोलन पूर्वी घेतलेल्या निर्णयानुसार पुढेही सुरु राहील, असे संयुक्त कृती समितीच्या वतीने सोलापूर विद्यापीठ संघटनेचे अध्यक्ष सुनील थोरात व सरचिटणीस रविकांत हुक्कीरे, कॉलेज कर्मचारी युनियनचे अध्यक्ष दत्ता भोसले व सरचिटणीस राजेंद्र गिड्डे, अशासकीय महाविद्यालयीन शिक्षकेतर कर्मचारी संघटनेचे अध्यक्ष अभिजित जाधव व सचिव भीमा मस्के यांनी कळविले आहे.
बुधवारी सोलापूर विद्यापीठ आणि शहर व जिल्ह्यातील ३७ अनुदानित महाविद्यालयातील महाविद्यालयातील ७५० शिक्षकेतर कर्मचाऱ्यांनी काळ्या फीती लाऊन आंदोलन केले. गुरुवारी सर्व विद्यापीठ व महाविद्यालयीन शिक्षकेतर बांधवांनी आपआपल्या कर्तव्यस्थळी नियोजित जागेवर एकत्रित जमा होतील. कोणीही बायोमेट्रीक किंवा हजेरी रजिस्टरवर स्वाक्षरी करणार नाही आणि संपूर्ण कामकाज दिवसभर बंद राहिल.
