आसाराम बापू बलात्कार प्रकरणात दोषी, न्यायालय शिक्षा ठोठावणार

स्वयंघोषित संत आसाराम बापूच्या सुरत येथील आश्रमात राहत असलेल्या अल्पवयीन मुलीवरील बलात्कार झाला, असं लहान बहिणीनं सांगितलं होतं. दुसरीकडे, मोठ्या बहिणीनं तक्रारीत आसारामवर बलात्काराचा आरोप केला होता. अहमदाबाद येथील आश्रमात आसारामनं तिच्यावर अनेकवेळा बलात्कार केल्याचं पीडितेनं सांगितलं. दोन्ही बहिणींनी पिता-पुत्राच्या विरोधात दोन स्वतंत्र तक्रारी दाखल केल्या होत्या.
यात गांधीनगर सत्र न्यायालयानं आसाराम बापूला 2013 मध्ये सुरतमधील दोन बहिणींवर झालेल्या बलात्कार प्रकरणी दोषी ठरवलं आहे. बलात्कार प्रकरणी आसाराम बापू यांना आज ( दि.३१) शिक्षा सुनावली जाणार आहे.
गुजरातच्या गांधीनगर न्यायालयात 2013 मध्ये सुरत येथे झालेल्या दोन बहिणींवरील अत्याचार प्रकरणी सोमवारी (दि.30) सुनावणी झाली. यात न्यायालयानं आसाराम बापू यांना दोषी ठरवलं असून आज त्यांना शिक्षा ठोठावली जाणार आहे. अल्पवयीन मुलीवरील बलात्काराच्या प्रकरणात आधीपासूनच आसाराम बापू हे जन्मठेपेची शिक्षा भोगत आहे.
2013 मध्ये सुरतमधील दोन बहिणींनी नारायण साई आणि त्याचे वडील आसाराम बापू या दोघांविरोधात बलात्काराची तक्रार दाखल केली होती. 2002 ते 2005 दरम्यान नारायण साईने वारंवार तिच्यावर बलात्कार केल्याचं अल्पवयीनं मुलीनं तक्रारीत म्हटलं होतं.
या प्रकऱणी आसारामची पत्नी लक्ष्मी, मुलगी भारती यांच्यासह या चार महिला अनुयायांनाही आरोपी करण्यात आलं होतं. परंतु, या सर्वांची न्यायालयानं निर्दोष मुक्तता केली आहे. आसाराम बापू सध्या जोधपूर कारागृहात आहेत. तसेच आसाराम बापूचा मुलगा नारायण साईही या प्रकरणी आरोपी असून काही दिवसांपूर्वी त्याला जन्मठेपेची शिक्षा ठोठावण्यात आली होती.
आसाराम बापू यांच्याकडून नुकताच न्यायालयात जामीनासाठी अर्ज दाखल केला होता. यावेळी दाखल अर्जात आसाराम बापू हे मागील 10 वर्षांपासून तुरुंगात असून त्यांचं वय 80 वर्षांपेक्षा जास्त आहे. तसेच ते गंभीर आजारानं त्रस्त आहे. त्यामुळे सर्वोच्च न्यायालयानं त्याच्या जामीन अर्जावर सहानुभूतीपूर्वक विचार करून उपचारासाठी जामीन मंजूर करावा अशी विनंती करण्यात आली होती.