सोलापूर : पत्रकारिता ही एक क्रियाशील विचारधारा आहे. विविध विषयांवर लेखन करणे हे पत्रकारितेचे अत्यंत महत्त्वाचे धोरण असते. त्यामुळे या ध्येयधोरणांना पूर्ण करण्यासाठी एक स्वामी भक्त या नात्याने स्वामी समर्थांचे आशीर्वाद पाठीशी असणे व साक्षात स्वामी समर्थांचे वरदहस्त आपल्या मस्तकी असणे गरजेचे असते, म्हणून महाराजांचे आशीर्वाद गरजेचे असल्याने पत्रकारितेतील विचारशक्तीला स्वामींचे आशीर्वाद लाभावे या करीता आज येथे श्री स्वामी समर्थांच्या दर्शनाकरिता आलो असल्याचे प्रतिपादन महाराष्ट्र राज्यातील आघाडीचे पत्रकार यदू जोशी यांनी केले. ते नुकतेच सपत्नीक येथील श्री वटवृक्ष स्वामी महाराज मंदिरास भेट देऊन श्री स्वामी समर्थांचे दर्शन घेतले. याप्रसंगी मंदिर समितीच्या वतीने समितीचे चेअरमन व नगरसेवक महेश इंगळे यांनी त्यांचा श्री स्वामी समर्थांचे कृपावस्त्र, प्रसाद, प्रतिमा देऊन यथोचित सन्मान केला. यावेळी ते बोलत होते. पुढे बोलताना जोशी यांनी मंदिर समितीच्या वतीने मंदिरातील विविध विकासकामे पाहून मन प्रसन्न झाले असून प्रचंड प्रसन्न वातावरणात स्वामींचे दर्शन घडल्याने अत्यंत आनंद झाला आहे असेही मनोगत व्यक्त केले. त्याप्रसंगी मंदिर समितीचे सचिव आत्माराम घाटगे, विश्वस्त महेश गोगी, श्रीशैल गवंडी, संजय पवार, विपुल जाधव, प्रसाद सोनार, सागर गोंडाळ, श्रीकांत मलवे, सुशांत बिराजदार, अविनाश क्षीरसागर, मोहन जाधव इत्यादी उपस्थित होते.
