नवरात्र गणेशोत्सवाच्या पार्श्वभूमीवर प्रवाशांचे हाल
येस न्यूज नेटवर्क : पुणे विभागातील हडपसर ते घोरपडीदरम्यान तिसऱ्या रेल्वे मार्गिकेचे काम वेगाने सुरू असून, या कामासाठी मध्य रेल्वेने १९ सप्टेंबर ते ४ ऑक्टोबर २०२६ या कालावधीत १५ दिवसांचा मेगाब्लॉक घेतला आहे. या ब्लॉकचा थेट परिणाम पुणे-सोलापूर मार्गावरील प्रवासी वाहतुकीवर झाला असून सोलापूरकरांची ब्लड लाइन समजल्या जाणाऱ्या हुतात्मा, सिद्धेश्वर सह अनेक गाड्या रद्द करण्यात आल्याने पुणे मुंबई प्रवास करणाऱ्यांची चांगलीच पंचाईत झाली आहे.
या मेगाब्लॉकदरम्यान पुणे-सोलापूर आणि सोलापूर-पुणे इंटरसिटी एक्स्प्रेस काही निश्चित तारखांना रद्द करण्यात आल्या आहेत. तसेच सोलापूर-सीएसएमटी सिद्धेश्वर एक्स्प्रेस ३ ऑक्टोबरला, तर सीएसएमटी-सोलापूर सिद्धेश्वर एक्स्प्रेस ४ ऑक्टोबरला रद्द राहणार आहे.या कामामुळे पुणे आणि हडपसर यार्डमध्ये अभियांत्रिकी, सिग्नलिंग, दूरसंचार तसेच ओव्हरहेड उपकरणांशी संबंधित कामे केली जात आहेत. त्यामुळे काही गाड्या रद्द, वळविल्या, अंशतः रद्द किंवा अन्य स्थानकांवरून सुरू व समाप्त करण्यात येत आहेत. एकूण ४२ गाड्या रद्द आणि २५ गाड्यांचे मार्ग बदलण्यात आल्याची माहिती समोर आली आहे.
सोलापूरच्या प्रवाशांना फटका
रेल्वे गाड्या रद्द झाल्यामुळे सोलापूर-पुणे प्रवासासाठी प्रवाशांचा एसटी बसकडे वाढता कल दिसत आहे. मेगाब्लॉकमुळे सोलापूर मध्यवर्ती बसस्थानकावर पुण्याकडे जाणाऱ्या नियमित तसेच अतिरिक्त बसेसना गर्दी होत आहे. खाजगी प्रवासी वाहतुक ही चढ्या दराने केली जात आहे
रेल्वे प्रशासनाने प्रवाशांना प्रवासापूर्वी आपल्या गाडीचे अद्ययावत वेळापत्रक आणि रद्दीकरणाची माहिती तपासूनच प्रवास करण्याचे आवाहन केले आहे. तिसऱ्या मार्गिकेचे काम पूर्ण झाल्यानंतर चार ऑक्टोबर पासून सर्व वाहतूक पूर्ववत होणार असल्याचे रेल्वे प्रशासनाकडून कळविण्यात आले आहे.
