महापालिकेच्या ‘इंद्रभुवना’ वरून प्रथमच तिरंगा उतरविला जाणार ! कारण….

सोलापूर शहराच्या वैभवात भर घालणारी आणि तब्बल एकशे दहा वर्षाहून अधिक वर्ष ताजमहल प्रमाणे उभी असलेली सोलापूर महापालिकेची प्रशासकीय इमारत म्हणजे इंद्रभुवन. स्वर्गीय अप्पासाहेब वारद यांच्या दूरदृष्टीने विविध स्थापत्य कलेचे मिश्रण करून ही इमारत उभारली गेली. सोलापूर महापालिकेची स्थापना 1 मे 1964 साली झाली असून त्यावेळी पासून या इमारती मध्ये प्रशासकीय कारभार चालतो म्हणून इंद्रभवनावर भारताचा तिरंगा ध्वज फडकत आहे. आता या इंद्रभुवन इमारतीचे साडेपाच कोटी रुपये खर्च करून स्मार्ट सिटी कंपनीकडून नूतनीकरणाचे काम सुरू आहे. त्यामुळे इथला सर्व प्रशासकीय कारभार कौन्सिल हॉल या इमारतीमध्ये हलवला जाणार आहे प्रोटोकॉल नुसार ज्या इमारतीमध्ये महापालिका आयुक्त बसतात त्या इमारतीवर तिरंगा ध्वज दररोज फडकविला पाहिजे आणि सायंकाळी उतरविला पाहिजे. सोमवारपासून महापालिका आयुक्त पी शिवशंकर कौन्सिल हॉल बिल्डींग मध्ये आपले कार्यालय स्थलांतरित करीत आहेत त्यामुळे इंद्रभूनावरील तिरंगा ध्वज देखील कौन्सिल हॉलच्या बिल्डिंग वर लावला जाणार आहे. महापालिकेच्या इतिहासात प्रथमच इंद्रभुवनावर दररोज फडकविला जाणारा तिरंगा ध्वज आता किमान सहा महिने या इमारतीवर दिसणार नाही.