येस न्युज मराठी नेटवर्क : ज्येष्ठ पार्श्वगायिका लता मंगेशकर यांचं निधन झालं आहे. वयाच्या 93व्या वर्षी त्यांनी जगाचा निरोप घेतला. मुंबईतल्या ब्रीच कँडी रुग्णालयात आयसीयूमध्ये त्यांच्यावर उपचार सुरू होते. कोरोनाची लागण झाल्यानंतर जवळपास महिनाभर त्या हॉस्पिटलमध्ये होत्या. त्यांना व्हेंटिलेटरवर ठेवण्यात आलं होतं. मात्र रविवारी सकाळी 8.12 वाजण्याच्या सुमारास त्यांनी अखेरचा श्वास घेतला. संगीतविश्वासह जगभरातल्या त्यांच्या चाहत्यांवर शोककळा पसरलीय. लता मंगेशकरांची प्रकृती चिंताजनक झाल्यानंतर त्यांच्यवर उपचार करणाऱ्या डॉक्टरांनी तसेच त्यांच्या कुटुंबीयांनी लता मंगेशकर यांच्या चांगल्या प्रकृतीसाठी प्रार्थना करण्याचं आवाहन केलं होतं. डॉक्टरांनीही शर्थीचे प्रयत्न केले, मात्र आज सकाळी त्यांची प्राणज्योत मालवली. आता जगभरातून त्यांना श्रद्धांजली वाहिली जातेय. सोशल मीडियावर लता मंगेशकर, #”Nightingale of India”, भारतरत्न, ओम शांती असे हॅशटॅग ट्रेंड होत आहेत. अनेकजण त्यांना आपापल्या परीनं श्रद्धांजली अर्पण करतोय. पंतप्रधान नरेंद्र मोदींसह विविध मान्यवरांनी त्यांना श्रद्धांजली अर्पण केलीय.
