सोलापूर : येथील जुना देगाव नाका परिसरातील रमजान गफूर शेख व थोबडे वस्तीतील प्रेम संजय हलकवडे यांचे काही दिवसांपूर्वी इतर व्यक्तींसोबत भांडण झाले होते. त्या भांडणात हलकवडे याची दुचाकी एका अनोळखी व्यक्तीने फोडली होती. माझी दुचाकी सोमनाथ आदिनाथ वाघमारे (रा. साठे-पाटील वस्ती, देगाव नाका) यानेच फोडली, असा संशय घेऊन रमजान व प्रेम या दोघांनी संगनमत करून सत्तुराने मारहाण केली.
डोक्यावरील वार हुकवला आणि तो डाव्या कानावर बसला. त्यानंतर प्रेम हलकवडे याने दंडावर, खांद्यावर व गालावर सपासप वार करून गंभीर जखमी केले. गंभीर दुखापत करून जीवे ठार मारण्याचा प्रयत्न केल्याची फिर्याद सोमनाथ वाघमारे यांनी सलगर वस्ती पोलिसांत दिली. त्यानुसार पोलिसांनी प्रेम हलकवडे व रमजान शेख या दोघांविरुद्ध 307 सह अन्य कलमान्वये गुन्हा दाखल केला आहे. घटनेचा पुढील तपास सहाय्यक पोलिस निरीक्षक इंद्रजित वर्धन हे करीत आहेत.
सिद्धेश्वर तलावात बुडाले
फिरायला बाहेर जातोय, असे सांगून सकाळी सात वाजता राजशेखर शरणप्पा जमाणी (वय 68) हे घराबाहेर पडले. श्री सिद्धरामेश्वर मंदिर परिसरातील तलावात ते पाय घसरून पडले. त्यांचा मुलगा सोमशेखर जमाणी यांनी त्यांना बेशुद्धावस्थेत तलावातून बाहेर काढले. ही घटना सोमवारी (ता. 23) सकाळी सात वाजता घडली. त्यानंतर त्यांना बेशुद्धावस्थेत श्री छत्रपती शिवाजी महाराज सर्वोपचार रुग्णालयात उपचारासाठी दाखल करण्यात आले. परंतु, उपचारापूर्वीच त्यांचा मृत्यू झाल्याचे डॉक्टरांनी नातेवाइकांना सांगितले. या घटनेची नोंद सिव्हिल पोलिस चौकीत झाली आहे. राजशेखर हे मागील सात-आठ वर्षांपासून मानसिकदृष्ट्या आजारी होते, अशीही नोंद पोलिसांत झाली आहे.
