टोकियो: टोकियो ऑलिम्पिकमधील सातवा दिवस भारतासाठी आनंदी ठरला. बॉक्सिंगमध्ये ६९ किलो वजनी गटात झालेल्या उपांत्यपूर्व फेरीत भारताच्या लव्हलिन बोर्गोहेनने तैपईच्या निएन चिन चेनचा पराभव करत देशाचे दुसरे पदक निश्चित केले.लव्हलिन बोर्गोहेनने निएन चिन चेनवर ४-१ असा विजय मिळवला. ऑलिम्पिक स्पर्धेतील भारताचे हे तिसरे पदक ठरले आहे.
याआधी २००८ च्या बिजिंग ऑलिम्पिकमध्ये विजेंदर सिंगने कास्य, २०१२मध्ये लंडन ऑलिम्पिकमध्ये मेरी कोमने कास्य पदक जिंकले होते आणि आता लव्हलिने पदक निश्चित केले आहे. आता या पदकाचा रंग कोणता असेल याची सर्वांना उत्सुकता आहे.लव्हलिनने सुरुवातीच्या काळात फार संघर्ष केलाय. तिचे वडील टिकेन यांचे छोटे दुकान होते. लव्हलिनकडे ट्रकसुटसाठी देखील पैसे नव्हते. डायटसाठी देखील तिला संघर्ष करावा लागला होता.लव्हलिनने २०१८ आणि २०१९ साली वर्ल्ड बॉक्सिंग चॅम्पियनशिपमध्ये कास्य पदक जिंकले होते तर पहिल्या इंडियन ओपन इंटरनॅशनल बॉक्सिंग स्पर्धेत रौप्य आणि दुसऱ्या स्पर्धेत सुवर्णपदक जिंकले होते. २०१७ साली तिने आशियाई बॉक्सिंग चॅम्पियनशिपमध्ये कास्य पदक मिळवले होते.पदकतालिकेत सध्या चीन १६ सुवर्ण, ७ रौप्य आणि १० कास्य पदकासह पहिल्या तर जपान १५ सुवर्ण, ४ रौप्य आणि ७ कास्य पदकासह दुसऱ्या स्थानावर आहे. अमेरिका १४ सुवर्ण, १६ रौप्य आणि ११ कास्य पदकासह तिसऱ्या स्थानावर आहे. भारत एका रौप्य पदकासह ४७व्या स्थानावर आहे.
