नवी दिल्ली : काश्मीरमध्ये एअरफोर्सच्या तळावर झालेल्या ड्रोन हल्ल्यानंतर आता दिल्लीमध्ये अशाच प्रकारचा हल्ला होण्याची शक्यता गुप्तचर यंत्रणांनी व्यक्त केली आहे. सध्या सुरु असलेले संसदेचे पावसाळी अधिवेशन आणि काश्मीरमधून कलम 370 हटवल्याचा 5 ऑगस्टला येणारा वर्धापनदिन हे निमित्त साधत पाकिस्तानी दहशतवादी दिल्लीत स्फोट करण्याच्या तयारीत असल्याचा इशारा गुप्तचर यंत्रणांनी दिला आहे. त्यामुळे दिल्लीतील सुरक्षा व्यवस्थेत वाढ करण्यात आली आहे.
भारतीय सीमा पार करून मानवी घुसखोरी करण्याचे पाकिस्तानचे बहुतांश प्रयत्न भारतीय लष्कराने हाणून पाडले आहेत. त्यामुळे सीमेपलिकडील दहशतवाद्यांकडून आता ड्रोनचा वापर केला जात आहे. एअरबेसवरील हल्ल्यानंतरही जम्मू काश्मीरच्या वेगवेगळ्या भागात असे ड्रोन आढळले होते. त्यातील अऩेक ड्रोनवर पोलिसांनी कारवाई केली होती. मात्र आता पुन्हा एकदा ड्रोनचा वापर करून त्यातून स्फोटक पाठवण्याची तयारी दहशतवादी संघटनांकडून सुरू असल्याची माहिती सूत्रांनी दिली आहे.दिल्ली पोलिसांनी सर्व युनिट्सना सतर्क राहण्याचे आदेश देण्यात आले असून ड्रोन हल्ल्याशी मुकाबला करण्याचे प्रशिक्षण मिळालेल्या टीम दिल्लीत तैनात करण्यात आल्या आहेत. दिल्लीत यंदा 4 अँटी ड्रोन सिस्टीम बसवण्यात आल्या आहेत. गेल्या वर्षी केवळ दोन अँटी ड्रोन सिस्टिम लावण्यात आल्या होत्या. मात्र यंदा त्यांची संख्या दुप्पट करण्यात आली आहे. पोलीस आणि सैन्यातील काहीजणांना ड्रोनचा मुकाबला करण्यासाठी विशेष प्रशिक्षण देण्यात आले आहे.
