ऊर्जामंत्री डॉ. नितीन राऊत यांच्या हस्ते मुख्यमंत्र्यांना धनादेश सुपुर्द
मुंबई, दि. १५ : मुख्यमंत्री सहायता निधी (कोविड-१९) साठी महापारेषणकडून १ कोटी ४२ लाख ४३ हजार ४११ रुपयांचा धनादेश मुख्यमंत्री श्री. उध्दव ठाकरे यांच्याकडे ऊर्जामंत्री डॉ. नितीन राऊत यांनी सुपुर्द केला.
मुख्यमंत्री यांच्या वर्षा निवासस्थानी हा धनादेश सुपुर्द करण्यात आले. यावेळी मुख्य सचिव सीताराम कुंटे, मुख्यमंत्री यांचे अतिरिक्त मुख्य सचिव आशिषकुमार सिंह, प्रधान सचिव विकास खारगे, ऊर्जा विभागाचे प्रधान सचिव तथा महापारेषणचे अध्यक्ष व व्यवस्थापकीय संचालक दिनेश वाघमारे, महानिर्मितीचे अध्यक्ष व व्यवस्थापकीय संचालक संजय खंदारे, महावितरणचे अध्यक्ष व व्यवस्थापकीय संचालक विजय सिंघल उपस्थित होते.
मुख्यमंत्री श्री. ठाकरे यांनी महापारेषणच्या अधिकारी, कर्मचाऱ्यांची या योगदानाबद्दल प्रशंसा केली आहे. कोविड-१९ च्या संकटात हे सर्व अधिकारी, कर्मचारी वीजवहन अखंडित रहावा, यासाठी आणि कोकण किनारपट्टीत आलेल्या निसर्ग चक्रीवादळ, तौक्ते चक्रीवादळासारख्या आव्हानात्मक परिस्थितीतही सदैव सज्ज राहिले आहेत. यातूनही त्यांनी मुख्यमंत्री सहाय्यता निधीत योगदान देण्याची संवेदनशीलता दाखविली आहे, जी कौतुकास्पद आहे.
यात महापारेषणच्या अधिकारी, कर्मचाऱ्यांच्या एक दिवसाच्या वेतनातून हे योगदान धनादेशाच्या रुपात मुख्यमंत्री सहाय्यता निधी कोविड-१९ साठी देण्यात आले आहे.
