एसटी व रिक्षा मध्ये चोऱ्या करणाऱ्या सात महिलांना अटक

येस न्युज मराठी नेटवर्क : विजापूर नाका पोलीस स्टेशनच्या डीबी पथकाने सात महिलांना अटक करून लक्ष्मी हार व ४४ हजार रुपये रोख असा ९४ हजार रुपयांचा मुद्देमाल जप्त केला आहे. या महिला एसटी बसमध्ये गर्दीचा फायदा घेऊन तसेच शेअर रिक्षा मध्ये प्रवासी महिलांकडे रोख रक्कम व दागिने चोरत असल्याचे स्पष्ट झाले आहे. यासरी शिवा परकालालू ,शारदा कृष्णा गाजू , शांती कृष्णा गाजू, राधा राकेश पद्मशाली, ज्योती राजू गाजू ,मिल्की विशाल परकलालू आणि मंजू दावीद परकलालू या महिलांनी वरील दोन्ही चोऱ्या केल्याची कबुली दिली आहे. 30 मार्च रोजी सकाळी साडेनऊ वाजण्याच्या सुमारास विजयालक्ष्मी लक्ष्मण बिराजदार या आपल्या मुलीसह सिंदगी ते सोलापूर असा एसटीने प्रवास करीत होत्या . टाकळी येथे आल्यावर एसटी मध्ये पाच महिला चढल्या होत्या. गर्दीचा फायदा घेत या महिलांनी विजयालक्ष्मी बिराजदार यांच्या बॅगेतील लक्ष्मीहार पळविला होता. दुसऱ्या एका घटनेत सैफुल ते विजापूर रोड या मार्गावर शेअर रिक्षातून येत असताना पर्समधील ५० हजार रुपये चोरीला गेल्याची फिर्याद विजापूर नाका पोलीस स्टेशनकडे दाखल झाली होती .या दोन्ही गुन्ह्यातील मुद्देमाल जप्त करण्यात विजापूर नाका पोलीस स्टेशनच्या पथकाला यश आले आहे. विजापूर नाका पोलीस स्टेशनचे पोलीस निरीक्षक उदयसिंह पाटील यांच्या नेतृत्वाखाली पथकाने ही कामगिरी केली आहे. त्याचप्रमाणे विजापूर नाका परिसरातील पुष्कर हॉटेलमध्ये घरफोडी करणाऱ्या पाच बालकांना अटक करून १४ हजार ५०० रुपयांचा मुद्देमाल जप्त केला आहे.