प्रिसिजन समूहाच्या सीएसआर फंडातून साकारणार निवासी शाळा
बार्शी : कोरफळे (ता. बार्शी) येथील अजित फाउंडेशन संचलित ‘स्नेहग्राम’ या प्रकल्पात ‘प्रिसिजन’ समूहाच्या पुढाकारातून निवासी शाळेची निर्मिती केली जात आहे. या प्रकल्पाचा भूमीपूजन समारंभ प्रिसिजन फाउंडेशनच्या अध्यक्षा डॉ. सुहासिनी शहा यांच्या हस्ते आज म्हणजे गुरुवारी (दि. ४ मार्च) पार पडला.
सौ. विनया आणि श्री. महेश निंबाळकर या दांपत्याच्या वतीने भटक्या, वंचित मुलांना समाजाच्या मुख्य प्रवाहात आणण्यासाठी ‘स्नेहग्राम’ हा निवासी प्रकल्प चालविला जातो. निंबाळकर दांपत्याचे हे कार्य २००७ सालापासून सुरू आहे. विशेष म्हणजे यासाठी त्यांनी आपल्या सरकारी शिक्षकी पेशाचाही त्याग केला आहे.
भीक मागणारी, शाळाबाह्य, अनाथ, लैंगिक शोषण झालेली, कैद्यांची मुले निंबाळकर दांपत्याने पालावर स्वतः फिरून गोळा केली. त्यांना शिक्षणाची गोडी लावली. मात्र पूर्णवेळ निवासी प्रकल्प उभा केल्याखेरीज अपेक्षित उद्दिष्ट साध्य होणार नाही हे ओळखून त्यांनी ‘स्नेहग्राम’ची स्थापना केली. त्यातूनच भटक्यांच्या शाळेची संकल्पना पुढे आली.
स्नेहग्रामच्या या कार्याची दखल आनंदवनाचे प्रणेते असणाऱ्या आमटे परिवारानेही घेतली. बाबा आमटे यांचे नातू आणि डॉ. विकास आमटे यांचे चिरंजीव कौस्तुभ आमटे यांनी निंबाळकर दांपत्याला मदतीचा हात दिला. प्रिसिजन समूहाने देखील २०१८ साली ‘प्रिसिजन गप्पां’मध्ये सामाजिक कृतज्ञता पुरस्कार देऊन ‘स्नेहग्राम’चा गौरव केला होता.
या पार्श्वभूमीवर आज या प्रकल्पात प्रिसिजन समूहाच्या सीएसआर फंडातून निवासी शाळेची वर्गखोली व शिक्षक निवास यांचा भूमीपूजन समारंभ झाला. शाळेच्या माध्यमातून आता या प्रकल्पात शिक्षणाची गंगा अवतरणार आहे.
डॉ. सुहासिनी शहा यांच्या हस्ते कुदळ मारून भूमीपूजन करण्यात आले. तसेच प्रकल्पाचा सविस्तर आराखडा असणाऱ्या फलकाचेही अनावरण करण्यात आले.
यावेळी अहमदनगरच्या स्नेहालय संस्थेचे गिरीष कुलकर्णी, ज्येष्ठ पत्रकार राजा माने, दत्ता बारगजे, दीपक नागरगोजे, विनया व महेश निंबाळकर यांच्यासह पंचक्रोशीतील ग्रामस्थ उपस्थित होते.
