सोलापूर, दि. २९- सोलापूर येथील विडी उद्योग व विडी कामगारांच्या किमान वेतनाच्या प्रश्नावर तातडीने संयुक्त बैठक आयोजित करून समन्वयाने तोडगा काढावा, अशी मागणी खासदार प्रणिती शिंदे यांनी मुख्यमंत्री देवेंद्र फडणवीस तसेच कामगार मंत्री अँड आकाश फुंडकर यांच्याकडे निवेदनाद्वारे केली आहे.
खासदार प्रणिती शिंदे यांनी दिलेल्या निवेदनात म्हटले आहे की, सोलापूरचा विडी उद्योग हा हजारो कामगारांच्या, विशेषतः महिला कामगारांच्या उदरनिर्वाहाचा प्रमुख आधार असून सुमारे पन्नास हजार विडी कामगारांचा रोजगार या उद्योगावर अवलंबून आहे. त्यामुळे उद्योगासमोर निर्माण झालेली सध्याची परिस्थिती अत्यंत गंभीर असून शासनाने त्यात तातडीने हस्तक्षेप करण्याची आवश्यकता आहे.
सध्या विडी कामगारांच्या किमान वेतनाच्या प्रश्नावरून विडी कामगार, कामगार संघटना आणि विडी कारखानदार यांच्यात मतभेद निर्माण झाले आहेत. वाढत्या महागाईच्या पार्श्वभूमीवर कामगारांना त्यांच्या श्रमाचा योग्य मोबदला मिळावा आणि शासनाने निश्चित केलेल्या किमान वेतनाची अंमलबजावणी व्हावी, ही कामगारांची रास्त मागणी असल्याचे खासदार प्रणिती शिंदे यांनी नमूद केले आहे.
त्याचवेळी वाढीव मजुरी, मागील फरकाची रक्कम, उत्पादन खर्चात झालेली वाढ आणि बाजारातील स्पर्धा यामुळे उद्योगावर मोठा आर्थिक भार पडत असल्याचे विडी कारखानदारांचे म्हणणे आहे. वाढीव खर्च परवडत नसल्याने विडी कारखानदारांनी १ सप्टेंबर २०२६ पासून कारखाने बेमुदत बंद करण्याची तसेच उद्योग तेलंगणा राज्यात स्थलांतरित करण्याची भूमिका घेतल्याचेही त्यांनी निदर्शनास आणून दिले.
सोलापूरमधील विडी उद्योग बंद पडल्यास किंवा स्थलांतरित झाल्यास हजारो कामगारांचा रोजगार धोक्यात येईल आणि त्यांच्या कुटुंबांच्या उपजीविकेवर गंभीर परिणाम होईल. तसेच रोजगाराच्या संधी कमी झाल्यास इतर शहरांमध्ये व राज्यांमध्ये कामगारांचे स्थलांतर वाढण्याची शक्यता असल्याची चिंताही खासदार प्रणिती शिंदे यांनी व्यक्त केली आहे.
या पार्श्वभूमीवर विडी कारखानदारांचे प्रतिनिधी, विडी कामगार संघटनांचे प्रतिनिधी, लोकप्रतिनिधी, कामगार विभागाचे अधिकारी आणि जिल्हा प्रशासन यांची तातडीने संयुक्त बैठक आयोजित करण्यात यावी, अशी मागणी खासदार प्रणिती शिंदे यांनी केली आहे. या बैठकीत किमान वेतन, वाढीव मजुरीचा उद्योगावर होणारा आर्थिक परिणाम, कामगारांचा रोजगार आणि उद्योगाचे भवितव्य यांचा सर्वंकष विचार करून दोन्ही बाजूंना मान्य होईल असा न्याय्य, व्यवहार्य आणि कायमस्वरूपी तोडगा काढण्यात यावा, असेही त्यांनी म्हटले आहे.
सोलापूरचा विडी उद्योग हा केवळ व्यवसाय नसून हजारो कष्टकरी कामगार आणि त्यांच्या कुटुंबांच्या उपजीविकेचा आधार असल्याचे सांगत, कामगारांना योग्य किमान वेतन मिळावे, उद्योग बंद पडू नयेत, उद्योगाचे स्थलांतर होऊ नये आणि हजारो कामगारांचा रोजगार सुरक्षित राहावा यासाठी शासनाने तातडीने पुढाकार घेऊन सर्व संबंधित घटकांमध्ये समन्वय साधावा, अशी मागणी खासदार प्रणिती शिंदे यांनी केली आहे.
