मुंबई: दादरा नगर हवेलीचे खासदार मोहन डेलकर हे मुंबईतील एका हॉटेलच्या खोलीत मृतावस्थेत आढळून आले. मरीन ड्राइव्ह येथील एका हॉटेलात त्यांचा मृतदेह सापडला. त्यांनी आत्महत्या केल्याचा संशय आहे. वरिष्ठ अधिकारी घटनास्थळी रवाना झाले आहेत.
मिळालेल्या माहितीनुसार, मरीन ड्राइव्ह येथील हॉटेलात त्यांचा मृतदेह सापडला. घटनेची माहिती मिळताच पोलीस तिथे पोहोचले. त्यांच्या मृतदेहाजवळ सुसाइड नोट सापडली आहे. प्राथमिक तपासात त्यांनी आत्महत्या केल्याचा संशय व्यक्त केला जात आहे. मात्र, पोलिसांकडून अद्याप स्पष्ट माहिती देण्यात आली नाही.
डेलकर यांनी २००४मध्ये भारतीय नवशक्ती पक्षाच्या तिकीटावर ते निवडून आले होते. फेब्रुवारी २००९मध्ये ते पुन्हा काँग्रेसमध्ये गेले. मात्र, २०१९ मध्ये त्यांनी अपक्ष म्हणून लोकसभा निवडणूक लढवली आणि जिंकून आले. २०२० मध्ये त्यांनी संयुक्त जनता दलात प्रवेश केला होता.
